Novo sinxelo lanzado pola banda muradá Deleiba. E chega en clave mariñeira, buscando respostas a grandes cuestión da vida no reflexo do mar. Faino ademias cunha aposta sincera á par que arriscada, na que a banda afástase da súa zona de confort da candela. O quinteto afincado en Boavista (Muros) expande o seu espectro musical cunha peza máis pausada. Ás raíces punk-rock da banda únese a sensibilidade do rock alternativo e progresivo, acompañado da crudeza do post-hardcore nas pasaxes máis intensas. Unha vestidura perfecta para cubrir os versos máis intimistas xamais compartidos polos muradáns.
Toda unha declaración de intencións, cociñada a lume lento nos estudos Pouland de Iago Pico, músico e produtor das Tanxugueiras, que tamén ten traballado con artistas da talla de Rayden ou os mítico rockeiros galegos Nao.
O videoclip, dirixido por Daniel Pérez (artífice de Erguerse, anterior aposta audiovisual do grupo), mostra a crudeza do traballo no mar e o refuxio no cotián como vía para evadirse dos pesadelos e dos soños sen cumprir. Unha curta liberadora, de vangarda, de impecable factura técnica e fiel á realidade de vilas costeiras como a de Boiro ou Rianxo, onde foi filmado.
Nova música para asaltar grandes eventos coma o Resurrection Fest
A aposta non remata aquí. Deleiba atópase compoñendo e gravando en estudo as cancións que conformarán o seu novo longa duración. Este sinxelo serve, ademais, como antesala á nova xira do grupo. Comezará en salas no mes de abril e estenderase ao longo do verán por citas de renome coma o Resurrection Fest de Viveiro.
Máis novas musiqueiras
- #SoandoconForza: 14 anos do primeiro concerto de Nudozurdo na Costa da Morte
- 2022: “Alegre Falsedad”. Como Deleiba combate o postureo das redes sociais.
- Febreiro 2021: Deleiba lanza "Erguerse", unha mensaxe de esperanza para o Rock Galego.
- Juan Figueiras: “A Sala Nasmo son os músicos”.
- ”A Sala Nasmo é un servizo crucial para o nacemento de bandas como Deleiba.