Este xoves non volver saír a comunidade escolar do IES Agra Leborís á rúa despois de dous meses de concentracións contra os recortes. Pero a loita continúa, desta volta a nivel político. Esta semana é o Grupo Municipal Socialista da Laracha o que denuncia a situación de masificación e falta de recursos no centro, onde se concentran 547 estudantes con tan só 42 profesores (son 90 alumnxs máis pero 6 profesores menos nos útimos 5 anos), un aumento, segundo eles, “alarmante”, que pon en risco a calidade educativa.

A voceira socialista, Inés Ramos López, destacou que “en 1º da ESO hai 121 alumnos repartidos en só cinco aulas, e en 4º hai 110 estudantes, superando as ratios recomendadas e incumprindo as normativas de seguridade”. Ademais, denunciou que materias como Física, Latín e Grego están a impartirse de forma online pola falta de espazos axeitados.

A moción que presentarán os socialistas o próximo xoves no pleno municipal insta á Xunta de Galicia a dotar o centro dos recursos materiais e humanos necesarios, incluíndo un incremento no persoal de apoio para o alumnado con necesidades específicas, pasando de 1 a 1,5 prazas de Pedagoxía Terapéutica (PT).

“A carencia de profesorado especializado e a masificación nas aulas dificultan gravemente a atención á diversidade e o progreso académico do alumnado”, afirmou Ramos López.

Tamén reclaman melloras nas infraestruturas, como a creación de espazos cubertos para os días de choiva e a dotación dunha aula de usos múltiples.
Segundo a voceira socialista, “a falta de acción por parte da Xunta agrava unha situación que leva anos deteriorándose, ignorando as demandas da
comunidade educativa e as mobilizacións multitudinarias”.

Máis novas sobre o centro