A loita por Corcoesto xa ten documental e unha nova curmá

08:25 12/02/15

Pazo da Cultura ateigado para o Tesouro de Corcoesto

Foi especial esta fin de semana para as xentes de Corcoesto. Tiña lugar en Carballo a estrea da Documental de Cora Peña “Tesouro de Corcoesto”, e o auditorio do Pazo da Cultura quedaba pequeno. Ducias de familias implicadas na documental quixeron estar presentes, previa reserva, na súa estrea como actores de primeira fila, dando conta que a loita por Corcoesto foi veciñal.

Un proxecto ademais financiado coas microachegas do crowfunding. De feito, moitos mecenas tamén quixeron velo de primeira man. De Carballo a outras partes do país, para ensinar como pelexa a cidadanía costeira. Boa conta da esta montaxe que fixo Bocixa entre o Teaser e a estrea.

Os Veciños, protagonistas da documental Tesouro de Corcoesto

Xoves 12 de Febreiro: Día mundial de solidariedade con Máxima Acuña

A xornada arrincaba ademais cunha mosa da solidariedade con Máxima Acuña, unha brava afectada do Perú tamén afectada por unha loita semellante. Así, a entrada no Pazo foi con esta pancarta do “Somos Máxima Acuña - Yanacocha Go Home”.

Hoxe xoves 12 de febreiro, precisamente celébrase o Día mundial de solidariedade con Máxima Acuña e a Plataforma pola defensa de Corcoesto e Bergantiño non quere deixar pasar a ocasión para amosar o apoio costeiro á loita de Máxima Acuña fronte a multinacional mineira Yanacocha.

O caso Máxima contra Yanacocha (filial de Newmont Mining) está no centro dun problema político que sacudiu Cajamarca e o Perú nas últimas décadas: a relación entre os grandes investimentos mineiros e os dereitos das familias e comunidades campesiñas que non desexan o desenvolvemento de actividades extractivas na súa contorna.
Unha vez un mineiro díxolle a Máxima Acuña que se estaba ao lado da mina ía ter o ceo, pero que se se puña en contra ía terminar esmagada, tal como un elefante esmaga a unha formiga.

A súa casa queda fronte á Lagoa Azul, unha das lagoas que serán afectadas o Proxecto Mineiro Conga e que forma parte da cabeceira de conca de Celendín: esta lagoa é o corazón de moitos ríos que irrigan o campo onde miles de campesiños sementan e cultivan a terra. E desa terra nace o noso alimento.
Máxima vive alí, arriba, onde nace a auga e o sol, entre choivas torrenciais e brétema turbulenta, entre ambiciosos mineiros e corrompidos "axentes da lei": Aquí naceu a súa coraxe.
Como unha muller enfrontada ao poder dunha gran empresa converteuse nun símbolo para os cajamarquinos, e para todos os que loitan por defender o medio ambiente contra a barbarie.

O 2011 foi para Máxima Acuña o ano do inicio dunha batalla desigual contra a poderosa mineira Yanacocha, que tenta tomar control dos seus terreos, descoñecendo, alega Acuña, o certificado en que consta que ela adquiriu a propiedade á comunidade de Sorocucho. Estas terras, nas que ela vive e traballa coa súa familia desde 1994, son contiguas á Lagoa. A historia previa é que a empresa quixo comprar e Máxima non quixo vender.

Máxima e a súa familia foron atacados por policías en varias ocasións, as máis graves en maio e en agosto de 2011. Houbo queimas, desfeitas; operarios introduciron maquinaria nos seus terreos, os seus fillos foron golpeados. Pero ela non soportou en silencio o abuso, denunciou unha e outra vez.

O pasado 3 de febreiro de 2015, o avogado Máxima Acuña dixo á prensa que polo menos 200 policías entraran nas súas terras en Tragadero Grande (Sorochuco, Cajamarca) e derrubaron a ampliación da casa desta, realizada para reforzar a estrutura da vivenda contra as choivas. Máxima Acuña é nun símbolo na loita contra os abusos da megaminería e na defensa da súa terra fronte a barbarie destrutiva do colonialismo.