Tesouro de Corcoesto, un documental en cernes sobre a mina de ouro

11:00 14/08/13

A través do crowdfunding en goteo.org, a documental de Cora Peña, "Tesouro de Corcoesto", está intentando conseguir fondos. Un novo episodio da loita social xurdida arredor do polémico proxecto da mina de ouro de Corcoesto, que xa pasa á historia por convertirse nun dos mellores exemplos de como unha sociedade organizada ten armas para loitar contra certas decisións.

Neste caso, colectivos conservacionistas foron da man dos veciños para reivindicar que un proxecto como unha mina de ouro a ceo aberto, nunha zona rural como Bergantiños, non é agradable.

Así, da necesidade de falar do novo modelo extractivo que se pretende instalar en Galicia, en sabendo que Corcoesto só era a súa primeira pedra, xurde esta documental.

Dende o propio proxecto definen a situación, que explica ás claras a necesidade de seguir tratanto o tema con franqueza:
Unha estratexia empresarial opaca. Unha aposta política por un modelo de desarrollismo feroz. Unha realidade socioeconómica deprimida, polarizada nun SI ou NON á mina. Científicos e ecologistas que se opoñen á aprobación medioambiental da Xunta, e que unen forzas coas asociacións antimina para presentar batalla legal e concienciar ao resto da poboación dos seus perigos. Medios de comunicación que se comportan como voceros do poder. Paralelismos con proxectos similares en distintos lugares do mundo. Esta é a complexa maraña que temos diante e á que intentaremos arroxar luz co noso documental.

"Hai moita información, pero segue sendo confusa para o público en xeral, e está generalmente descontextualizada", afirma a propia Cora Peña.

Como vemos no teaser, a documental tratatá de falar directamente con persoas implicadas en todo o proceso, como veciños, mariñeiros, ou personalidades como o experto en aves Rabuñal Patiño, sendo a información o seu obxectivo fundamental.

Estaremos atentos a este proxecto, que se propón financiarse vía crowdfunding por dous motivos claros: a independencia e a difusión libre do documental. Se queren botar unha pequena achega, non dubiden en entrar en Goteo.