Natalia Fariña gañou o segundo posto no Galiciencia 2016 co proxecto "Espantallo 2.o" Natalia Fariña Mata, alumna das aulas científico-tecnolóxicas Isidro Parga Pondal de Pontecso, vén de gañar o segundo posto no Galiciencia 2016 co seu proxecto "Espantallo 2.0"; un "boneco" pouco convencional co que xa conseguiu espantar os paxaros das leiras dos seus familiares. "Probámolo en varias leiras e funciona mellor ca o espantallo tradicional", asegura Natalia que estuda 4º da ESO no CPI As Revoltas. O "Espantallo 2.0" leva incorporadas unhas luz led, un buzzer e un sensor de movemento O "Espantallo 2.0" ten unha estructura de forma piramidal deseñada en SketchUp, impresa en 3D e cuberta con papel reflectante para molestar a vista dos paxaros. Ademais, o invento ten incorporados uns leds ultravioletas que facilitan que o papel reflicta cando non lle dea o sol. "No interior leva unha placa electrónica na que están conectadas as luces, un buzzer e un sensor de movemento", explica Natalia. Ao mesmo tempo, a nova investigadora construiu un espantallo tradicional con roupa vella e comparaounos. "Despois de probalos en distintas leiras, comprobamos que o 2.0 é máis eficaz que o espantallo convencional", asegura. . Natalia Fariña deseñou unha estructura piramidal en SketchUp   Premio Con este traballo, Natalia recibiu un reloxo intelixente e 500€ para asistir á feira científica vasca homóloga do Galiciencia. Ésta xa non é a primeira vez que esta alumna de Cabana se presenta a un concurso deste tipo; xa que en abril deste ano acadou o 3º posto do XVII Premio Luis Freire convocado polos Museos Científicos Coruñeses. No Galiciencia 2016, Natalia competiu con outros 50 traballos de alumnos de secundaria e bacharelato de toda a comunidade. O gañador do primeiro premio  foi Manuel Porto, alumno do colexio Compañía de María de Santiago de Compostela, co seu proxecto "Nin unha gota máis"; un innovador sistema de aforro de agua no fogar. Durante os tres días que durou Galiciencia pasaron pola exposición de proxectos e as actividades paralelas máis de 2000 persoas. O evento estivo organizado polo Parque Tecnolóxico de Galicia-Tecnópole, coa colaboración da consellería de Economía, Emprego e Industria e a Fundación Española para a Ciencia e a Tecnoloxía - Fecyt -.     Novas relacionadas

• O Bordón Multitono, o invento que revolucionará o mundo da gaita, D.O. carballés
• Un premio para os cibermentores doadores de Fisterra

Fonte

• Redacción QPC ([email protected])