A Praia da Cocha de Cee é unha das que máis sofre a contaminación pola falta de saneamento O Informe anual da Axencia Europa de Medio Ambiente sobre a Calidade das Augas de Baño, vén de sinalar 383 zonas en España onde a baixa calidade das mesmas debría obrigar ás institucións españolas a tomar medidas. De feito, a UE propón prohibir o baño en 29 praias e 29 ríos españoles, pola permanente mala calidade das augas nos últimos 5 anos. Chama a atención que boa parte destas están en Galicia, o que demostra un dos grandes problemas do país: a falta de saneamento. As áreas urbanas con falta de saneamento provocan índices de contaminación que deberían impedir o baño. Así, na Costa da Morte, a UE pon no punto de mira varias praias costeiras: a praia da Concha, en Cee; a Area da Vila en Camariñas; a praia de Camelle; e a praia de Sardiñeiro, en Fisterra. A praia de Sardiñeiro protagonizou estampas peculiares Precisamente, os avances na rede de saneamento parece que vai solventar bastantes os problemas no lugar de Sardiñeiro, se ben aínda quedaría outra fase. Non así en Camariñas, onde a Xunta ata perdeu os papeis e concello e administración autonómica se botan as culpas polas tardanzas, mentres a UE pide o peche de dúas das súas praias. Vista aérea da praia de Camelle E que podemos dicir máis do saneamento na ría de Corcubión, esquecida dende hai que deixa a Concha de Cee como foco de coliformes pola falta de separación entre augas fecais e pluviais. Caso aparte ten a virxe praia de Lires, a única pechada de Galicia pola contaminación dunha piscifactoría. Ademais, Gures tampouco pasaría un exame. Non aparece neste listado a praia de Area Maior, en Malpica, no punto de mira nas últimas semanas, a pesar de que o último control da calidade das augas daba un rapado suficiente. Unha nota que lle vale ao concello para asegurar que "auga da praia de Area Maior axústase aos parámetros de calidade e mellorará tras a recente entrada en servizo da EDAR". Praia de Area Maior de Malpica

As notas

A Clasificación Sanitaria das augas das praias de Galicia deixa datos ben interesantes. A maior parte dos areais costeiros teñen unha calidade Excelente das súas augas no índice de 2015 e válido en 2016, pero hai outras que non tanto, que aquí repasamos:

Concello	Praia	Clasificación sanitaria
Camariñas	Camelle	Insuficiente
Camariñas	Area da Vila	Insuficiente
Camariñas	Lingunde	Boa
Carballo	Arnados	Boa
Carballo	Razo	Boa
Carnota	San Pedro	Boa
Cee	Lires	Insuficiente
Cee	Estorde	Insuficiente
Cee	A Concha	Insuficiente
Corcubión	Santa Isabel	Suficiente
Fisterra	Corveiro	Boa
Fisterra	Ribeira	Boa
Fisterra	Sardiñeiro	Insuficiente
Malpica	Praia Maior	Suficiente
Muros	O Cabo	Boa
Muros	Virxe do Camiño	Insuficiente
Muros	A Rocha	Boa
Muros	Parameán	Boa
Muros	Medrón-Uia	Boa
Muxía	Area Maior	Boa
Muxía	Nemiña	Boa

 

Novas relacionadas

• 06-05-16: A Costa da Morte mantén as súas 6 bandeiras azuis.
• Novembro 2015: A Xunta perde os papeis co saneamento de Camariñas.
• Outubro 2015: O saneamento de Sardiñeiro estará funcionando o vindeiro mes.
• Xuño 2015: A praia de Lires, a única pechada ao baño de toda Galicia por mor da contaminación da piscifactoría.
• Febreiro 2015: O BNG reitera no Parlamento o informe sobre o estado da ría de Cee-Corcubión.

Fonte

• Redacción de QPC ([email protected]).