Xa puidemos comprobar como as familias son as grandes protagonistas da campaña de compostaxe caseira de Camariñas. E a vindeira semana o Concello comeza o reparto dos composteiros e a formación ás novas familia participantes no programa de compostaxe.

A súa formación e o seguimento personalizado correrá a cargo das técnicas de Amigos da Terra, que acompañarán a estas familias ao longo do proceso a fin de resolver dúbidas e solucionar problemas, capacitándoas para que elas soas continúen o proceso.

Se ben rematou a primeira fase de captación, o prazo de inscrición para sumarse ao programa de compostaxe segue aberto e o único requisito para formar parte é, ser veciño/a do Concello, ter un pequeno xardín ou terreo e estar disposto/a e motivado/a a formar parte desta iniciativa educativa e formativa. Para anotarse poden chamar ao teléfono 981 737 004 ou enviar un correo a [email protected].

A idea é chegar a 200 familias, que comecen a utilizar este composteiro para reducir residuos e transformalos en compost para os seus xardíns ou plantas. “Coa compostaxe estaremos reducindo nun 50% a cantidade de residuos enviados ó ciclo da xestión municipal, producindo un importante aforro municipal, ademais de obter un produto de calidade para os solos do noso Concello”, declara Sergio Caamaño, Concelleiro de Medio Ambiente e responsable do proxecto.

Novas relacionadas

• • As familias, as protagonistas da campaña de compostaxe caseira de Camariñas.
  • Camariñas quere sumar 200 vivendas ao programa de Compostaxe caseira