Asinaron onte opresidente da Deputación da Coruña, Valentín González Formoso, e a alcaldesa de Camariñas, Sandra Insua, un paso fundamental para o proxecto do futuro Museo dos Naufraxios. Trátase do convenio de colaboración para financiar as obras de reforma da envolvente exterior da antiga lonxa de Camariñas e da sala de exposicións “Beti Donosti”. O investimento total ascende a 430.000 euros, dos que a Deputación achega o 76,7 %, cunha contribución de 330.000 euros, mentres que o Concello asume o resto do financiamento con fondos propios.

A alcaldesa de Camariñas, Sandra Insua, puxo en valor a importancia do proxecto . “Falamos dun edificio que forma parte da memoria colectiva de Camariñas e que levaba anos deteriorándose. Grazas á colaboración coa Deputación, hoxe damos un paso decisivo para recuperalo e para facer realidade o Museo dos Naufraxios, un proxecto moi ambicioso que pretende poñer en valor a nosa relación co mar e coa historia da Costa da Morte”, afirmou.

As obras, unha vez finalizadas, permitirán dispoñer dun edificio estruturalmente consolidado, protexido fronte aos axentes meteorolóxicos e listo para afrontar a seguinte fase de acondicionamento interior e musealización do futuro Museo dos Naufraxios, un ambicioso proxecto chamado a converterse nun novo símbolo cultural do municipio e da comarca.

As obras

A actuación permitirá recuperar un edificio emblemático situado no peirao do Curbeiro, actualmente en estado de abandono tras décadas sen uso nin mantemento, e constitúe o primeiro paso para a posta en valor dun espazo público chamado a converterse nun referente cultural vencellado á memoria mariñeira e aos naufraxios da Costa da Morte.

O proxecto, redactado polo arquitecto Jorge Roura Traseira, contempla a reparación e consolidación estrutural do inmoble, así como a reforma integral da súa envolvente exterior, actuando fundamentalmente sobre cubertas, fachadas e carpinterías co obxectivo de frear o deterioro do edificio, mellorar a súa eficiencia enerxética e garantir condicións adecuadas de salubridade e conservación.

Entre as actuacións previstas inclúese a demolición da cuberta actual e a execución dunha nova cuberta con illamento térmico, combinando solucións de cuberta inclinada con acabado en zinc e cuberta plana non transitable con grava. Ademais, rehabilitaranse as fachadas mediante a instalación dun sistema de illamento térmico polo exterior (SATE), que permitirá reducir de forma significativa as perdas enerxéticas, e renovarase a carpintería exterior con portas e ventás de aluminio con rotura de ponte térmica e dobre acristalamento.

O proxecto mantén o volume xeral do edificio e a súa integración no entorno portuario, apostando por unha imaxe renovada pero respectuosa coa edificación orixinal e co seu carácter industrial e mariñeiro. Así mesmo, esta primeira fase non condiciona as futuras actuacións de musealización interior, que se desenvolverán nunha etapa posterior, unha vez consolidada a estrutura e protexida a envolvente do inmoble.