O sobriño do Alemán de Camelle pide dignidade para as cinzas do seu tío

13:36 05/02/16

Vimos de coñecer a carta que Clemens Gnadinger, sobriño de Manfred Gnadinger, Man de Camelle, vén de enviarlle ao alcalde de Camariñas, Manuel Valeriano Alonso de León. Clemens pide "dignidade e respecto" coas cinzas do seu tío, pois dálle moita pena ver o estado de cásaa museo de Man, e como se desmorona cada tempada e pregúntase, unhas semanas despois do anuncio do plan de rehabilitación, se "van facer algo para recuperala?”.

Clemens recorda que "fai máis de tres anos o meu tío Manfred Gnädinger foi incinerado para así poder ofrecerlle o seu lugar de descanso. Un dos poucos desexos que quedou reflectido no seu testamento era precisamente o de que as súas cinzas fosen depositadas no seu pequeno museo. Penso que isto debería ser respectado ante todo". Por iso dóese o familiar que "na celebración do 28 de decembro do 2012, acto no que vostede tamén estaba presente, e sempre ao meu lado, depositouse a urna simbólicamente diante da porta do seu museo e en especial, para a prensa!". Clemens creu que a súa visita de entón era para dar enterramento ás cinzas e ao non entender español nin ser informado polos organizadores atopábase confundido, e tardou en entender o proceso. Ata creu durante o acto que o alcalde era o encargado da funeraria e por iso preguntou a unha amiga que sabía alemán "por que a xente saúda tanto ao señor da funeraria?”.

"Eu albergaba a esperanza de que Man fose enterrado poucos días logo deste acontecemento no seu museo, tal e como el expresouno no seu testamento. Lamentablemente non sucedeu así. Todo en balde. Primeiro díxose que non era posible, xa que o frío impedía traballar. Despois que si había que reparar a porta antes de colocar a urna. Máis tarde que si non había permiso, que si había que traer un guindastre para poder facer o hoyo. Tan só pretextos e desculpas. Nada serio" laméntase o sobriño de artista. "Co tema da urna, máis do mesmo: primeiro que se atopaba na Casa de Cultura de Camelle, tamén que supuestamente estaba en casa dunha veciña de Camelle. Mercés Martín González aseguroume nunha reunión da fundación a principios do 2014 que as cinzas estaban sendo custodiadas no propio Concello de Camariñas. Nunca cheguei a velas. Realmente todo un misterio!" indica Clemens. "Todo isto resulta para min absolutamente incrible" di o parente, e por iso Clemens cre que é obvio que tanto ao alcalde como ao pobo “tráelles sen coidado o destino de Man. O mesmo dá que as cinzas sexan depositadas ou non”.

"Así como tamén me dá a impresión, e cada vez estou máis seguro diso, que a todos vostedes parécelles ben que tanto o museo como a súa contorna siga deteriorándose e desmoronándose cada vez máis" insiste o mozo, nunha crítica tamén moi frecuente en Camelle. Por iso pregúntase "si desde un principio estaba claro que non había interese ningún en depositar as súas cinzas no museo, por que se lle incineró? Por que Man logo de máis de tres anos aínda non está enterrado no seu museo? Cando chegará por fin ese día?”. Clemens finalmente fai unha petición con dor e rabia ás autoridades locais pero en certa parte tamén á sociedade á que man deixou a súa obra e tamén 125.000 euros, que se levou o estado español. "Simplemente pido dignidade e respecto para Man”.