Se as de Muxía levan meses de mobilizacións, as traballadoras do Servizo de Axuda no Fogar de Camariñas non ían ser menos, e esta semana lanzan un comunicado a través de UXT no que denuncian que están a cobrar por baixo do establecido nas táboas salariais do seu convenio colectivo, e que a empresa concesionaria do servizo, Sociser Galicia, non actualizou os soldos de 2023 nin aplicou a subida en 2024.

Co contrato municipal prorrogado dende 2022, a empresa asegura non ter cartos abondos para facer efectiva a subida das táboas, polo que, en 2023, cando tiñan que aplicar a subida do 5,7 % (conforme ao IPC do ano anterior), o incremento foi de só o 3,5 %, mentres que tampouco se aplicou este ano a subida correspondente, do 3,1 %.

Sinalan tamén que os plus de festivos e domingos non se están incrementando, polo que as traballadoras non teñen máis remedio que saír á voz pública.

As traballadoras e o sindicato puxeron a situación en coñecemento do goberno local de Camariñas nunha reunión o pasado 1 de febreiro, e apuntaron que as empregadas (un persoal de 25 persoas) tiveron que interpor demandas individuais, ademais dunha demanda colectiva para reclamar o abono das cantidades debidas.

Mentres esperan a resolución da demanda, esperan que o Concello anra novos pregos de contratación, cunha clara actualización económica, antes de xuño, cando remata a actual prórrroga.

”As rapazas estamos encrespadas”, recoñecen as propias traballadoras malia recoñecer que non sofren retrasos nos pagos, e deixando claro que por agora non teñen intención de realizar accións de presión, porque “contra a alcaldesa mon temos nada”,

Finalmente, tamén se puxeron en coñecemento do goberno local outros problemas no servizo, como o excesivo número de contratos a tempo parcial ou problemas laborais relacionados coa xestión do devandito servizo.

Máis novas