Arrincaron de novo os cursos formativos enfocados ao emprego do Forum Carballo. Cursos moi demandados, que ofrecen a 80 veciños e veciñas unha preparación precisa para acceder ao mercado laboral en cinco especialidades cunha alta demanda.

Falamos dos cursos de cociña, operacións auxiliares de montaxe e instalacións electrotécnicas e de telecomunicacións en edificios, soldadura con electrodo revestido e TIG e montaxe de mobles e elementos de carpintería que comezaron estas semanas, e nos que hai 60 persoas inscritas.

Paralelamente outras 20 persoas participan no obradoiro dual de emprego “Carballo Coida”.

A formación concreta compleméntase con accións puntuais como a visita realizada á semana pasada á sede da ONCE en Galicia ou a sesión sobre terapias asistidas con animais na que participaron onte, coa colaboración do centro especializado Candamín, con gran experiencia no traballo con colectivos como a infancia, as persoas maiores, con discapacidade física ou intelectual e vítimas de violencia de xénero, entre outros.
Algunhas destas accións formativas extraordinarias son compartidas polo alumnado do obradoiro “Carballo Coida” e o do curso de Cociña, como a charla sobre alimentación saudable e patoloxías que ofreceu este luns a nutricionista María Viña.

Novo programa

Esa relación entre saúde e nutrición é, precisamente, o eixo arredor do cal xira o novo proxecto de obradoiro que vén de aprobar a Xunta de Goberno Local para presentar a solicitude de subvención, por 524.464 euros, á Xunta de Galicia. “Fórum Dual” é unha acción formativa na que pretendemos involucrar a outras 20 persoas: 10 na especialidade de cociña e 10 en atención sociosanitaria a persoas dependentes en institucións sociais, buscando o vínculo entre a alimentación e a atención ás persoas maiores, con diversidade funcional ou menores con distintas patoloxías.

Máis novas sobre Formación