O concello de Carballo está a acometer a instalación de novos pavimentos nos pavillóns do IES Monte Neme O alcalde de Carballo - Evencio Ferrero - mantivo onte unha xuntanza co xefe territorial da consellería de Educación - Indalecio Cabana - co obxectivo de facerlle chegar unha serie de necesidades de mellora en varios centros educativos, entre elas unha nova sede para o CRA Ponte da Pedra e diversas actuacións nos CEIP Bergantiños e Gándara-Sofán. Por parte do concello de Carballo estase a acometer nestes momentos a instalación de novos pavimentos nos pavillóns do IES Monte Neme e o CEIP Fogar, unha actuación prevista nos convenios de colaboración con ámbolos centros para que as instalacións deportivas poidan ser xestionadas a través da concellería de Deporte fóra do horario lectivo e que deste xeito poidan estar a disposición das entidades deportivas. O investimento acada os 78.529 euros. Os novos pavimentos están adaptados á normativa europea sobre seguridade e confort do deportista e ademais pintaranse pistas para a práctica de diferentes modalidades deportivas. Con respecto ao IES Monte Neme, por parte da Consellería de Educación tamén está previsto acometer de xeito inmediato un proxecto de ampliación que suporá un investimento de 825.000 euros, e que incluirá, entre outras melloras, a adaptación e modernización dos talleres. “Espazo solidario” A idea é convertir as antigas vivendas dos mestres nun espazo solidario Na xuntanza de onte tamén se chegou a un acordo para iniciar o procedemento de desafectación das antigas vivendas dos mestres, que se atopan desocupadas e en mal estado. O concello de Carballo xa conseguiu no seu momento recuperar un dos bloques, no que se sitúan as sedes da Cruz Vermella e a Asociación Íntegro, e pretende utilizar o resto dos edificios para crear un “espazo solidario” no que terán cabida entidades que traballan no eido social. Novas relacionadas

• O IES Monte Neme recibe un premio para levar a cabo un proxecto tecnolóxico sobre a igualdade

Fonte

• Redacción QPC ([email protected])
• Concello de Carballo