Carlos Lixó recibe o premio do XIV certame de artigos xornalísticos normalizadores de Carballo

08:08 25/05/18

carlos-lixo-artigo-xornalistico-carballo

Esta era a segunda vez que Carlos Lixó, profesor de Historia na USC, visitaba Carballo Onte foi a 2ª vez que Carlos vistou Carballo. A primeira foi fai algúns anos cunha excursión organizada pola súa parroquia cando ía ao catecismo e a segunda foi onte para recoller o Premio a artigos xornalísticos normalizadores. Entre unha e outra xa pasou tempo, aínda que non tanto, porque o gañador da 14ª edición do certame ten 26 anos e aparenta aínda menos. Coa grata sorpresa de que o seu artigo Alpabardas verdes fose o seleccionado polo xurado e co compromiso de regresar a Carballo polo menos unha terceira vez, o investigador e profesor de Historia en formación na Universidade de Santiago, Carlos Lixó recibiu o cheque por 1.250 euros nun acto no que ademais de Evencio Ferrero participaron os concelleiros Xosé Regueira, Milagros Lantes e Marcos Trigo. Ademais do premio en metálico, o alcalde agasallou ao gañador cun lote de publicacións literarias e audiovisuais editadas polo Concello. No caso de Carlos Lixó, na súa relación con Carballo está moi presente o numero 3, xa que tamén esta foi a terceira vez que se presentou a un certame que, como el mesmo confirmou, gaña en prestixio en cada edición. “O premio de Carballo xa todo o mundo o coñece”, asegurou. Carlos Lixó tivo que competir con outros 52 autores e autoras, e agora verá o seu artigo publicado, este mesmo domingo 27, nos nove medios de comunicación colaboradores: Diario de Bergantiños, El Correo Gallego, Galicia Confidencial, La Opinión de A Coruña, La Voz de Galicia, Praza Pública, Sermos Galiza, Tempos Novos e en Que Pasa na Costa. Os obxectivos do premio son promover a reflexión sobre a situación social da lingua, crear espazos nos xornais para analizar e fomentar o idioma galego e promover o seu uso na prensa escrita. Nas trece edicións anteriores foron premiados/as autores/as como Xurxo F. Carballido, Olga Patiño, Ana R. Barreiro, Ramón Vilar, Miguel Mosquera, Séchu Sende, Kiko Novoa, Xesús Fraga, Pilar García Negro, Marica Campo, Marcos Abalde, Carlos Callón, Mariña Pérez Rei, José Casás, Luz Cures, Borxa Tenreiro ou Iria Veiga.