Cómpre ir velas, porque as instalacións coas que conta o centro de Formación e Emprego do Forum Carballo son unha pasada. Máquinas pioneiras de soldadura, un espazo personalizado para cada mecánico, unha cociña impresionante para os aprendices de hostaleiros…

Estes meses, 40 mozos aproveitaron 4 accións formativas para desempregados. Uns cursos que remataban este mes, sendo o de cociña o último en pechar, con moi bos resultados, segundo se desprende tanto das valoracións dos estudantes coma do equipo docente. A profesora de cociña, Marisa Rodríguez, tamén os acompañou xunto ao concelleiro Marcos Trigo no seu último día, no que remataron o módulo formativo sobre creación de empresas.

O concelleiro de Formación e Emprego expresou o seu desexo de que os coñecementos teóricos e prácticos adquiridos (o curso incluíu 80 horas de formación en empresas) lles sirvan para abrirse camiño no mundo laboral, e lembrou que a hostalería é un dos sectores que máis persoal demanda tanto a través do Servizo Público de Emprego coma da Bolsa de Traballo do Concello de Carballo.

Os cursos Accións Formativas para Desempregados (AFD), subvencionados pola Consellería de Traballo e Benestar, incluíron tamén módulos transversais sobre formación para a igualdade, inserción laboral, sensibilización medioambiental, creación de empresas e prevención de riscos laborais. Todas estas accións formativas levan aparellada a obtención dun certificado oficial de profesionalidade.

Novas relacionadas

• 40 desempregados aproveitan as pioneiras instalacións do Forum Carballo.
• FormaCIP: formación audiovisual de vangarda.
• O edificio dos 100 actos.
• Bergantiños á vangarda tecnolóxica galega.
• #ForoMobilidade: Carballo repensa o seu modelo de cidade.
• O #CursoTurismoUDC de Carballo propón modernizar o sector da Costa da Morte.
• 4 novos cursos de formación en cociña, restaurante, soldadura e electricidade en Carballo.

Fonte

• Redacción de QPC (info@quepasanacosta.gal).