Hai poucos exemplos mellores que o de Carballo en todo país de como sobre como revivir un Mercado de Abastos. Ademais de convivir de xeito inmellorable co feirón dos xoves e dos domingos, téñense feito ducias de campañas para darlle vida, como convertilo en escenario/auditorio para eventos tan singulares como o Carballo Interplay, nunha escola de consumo e saúde, ou no epicentro das feiras como a de Bercamel; promover campañas de atracción como regalar as plantas de temporada retiradas dos xardíns municipais, ou acoller numerosas charlas como a de lactancia desenvolta onte.

Son xeitos de achegar á xente ao mercado, e aproveitar ese movemento para que os postos teñan máis vida. Unha das actividades que mellor funcionan son as degustacións. Xa o teñen comprobado coas xornadas de degustacións realizadas polo Obradoiro Dual de Emprego de Hostalería realizado o Fórum Carballo nos pasados cursos, servindo de experiencia profesional para o alumnado e de experiencia gastronómica para os clientes, que poden probar un pincho mentres fan as súas compras.

E seguindo precisamente esa liña, Concello e Deputación lanzan unha nova iniciativa para poñer en valor a gastronomía local como un recurso estratéxico para o desenvolvemento turístico. A través do Plan de Sostibilidade Turística en Destino (PSTD) Os Fogóns dos Anllóns, financiado pola Unión Europea a través dos fondos Next Generation EU no marco do Plan de Recuperación, Transformación e Resiliencia, van crear o ‘Laboratorio de cociña. Creación do centro experiencial de gastronomía local nos mercados’.

Así o asinaron onte o vicepresidente da Deputación da Coruña, Xosé Regueira, e o alcalde de Carballo, Evencio Ferrero, asinaron un convenio de colaboración para a posta en marcha da un proxecto enmarcado no Plan de Sostibilidade Turística en Destino (PSTD) Os Fogóns dos Anllóns.

Con esta intervención búscase poñer en valor a gastronomía local como un recurso estratéxico para o desenvolvemento turístico, apostando pola creación dun espazo dotado co equipamento necesario para realizar actividades culinarias, formativas e divulgativas. Así pois, contémplase como un recurso para a creación de produtos e experiencias turísticas, mediante a dotación de equipamento de cociña que permita unha inmersión dos turistas nunha contorna adecuada.

“A nosa estratexia turística pasa por situar a gastronomía como principal destino, que ademais de atraer visitantes é quen de contribuir á mellora socioeconómica da contorna, xerando oportunidades para a veciñanza, fomentando o emprendemento da mocidade e contribuíndo á fixación de poboación nos núcleos máis pequenos”, sinalou o vicepresidente. “Neste sentido, este proxecto que ademais se enmarca nun produto turístico de tan alto nivel como é Os Fogóns do Anllóns, é un claro exemplo de posta en valor dos nosos produtos e produtores e produtoras, e tamén deses espazos que son comunidade, historia e identidade: os mercados”.

Ademais, con esta iniciativa preténdese fortalecer o sector da restauración local mediante accións formativas que lles permitan incorporar os valores culturais e gastronómicos do territorio á súa oferta, así como favorecer a participación de produtores de quilómetro 0 e cociñeiros e cociñeiras da contorna na promoción conxunta dos produtos locais. Tamén se busca aproveitar a situación do mercado para a promoción da gastronomía do Anllóns.

Máis novas do proxecto