O delegado territorial da Xunta de Galicia na Coruña visitou onte o centro especial de Emprego de Aspaber en Carballo O delegado territorial da Xunta na Coruña - Ovidio Rodeiro - visitou onte o centro especial de Emprego da asociación de Pais de Discapacitados Psíquicos de Bergantiños (Aspaber), onde tivo a oportunidade de coñecer a labor que desenrola este centro e os ámbitos laborais nos que traballa. As persoas con discapacidade ou en risco de exclusión social son un colectivo prioritario para o Goberno galego. Proba diso é que o orzamento neste ámbito reforzouse este ano nun 18%. Cos seus 40 anos ás costas, Aspaber traballa na mellora da calidade de vida das persoas con discapacidade e das súas familias. Conta cun centro ocupacional que ofrece atención aos seus usuarios e no que se facilita o desenvolvemento das capacidades residuais en áreas formativo-laborais e ocupacionais coa finalidade de conseguir un axuste persoal, social e laboral que os leve á súa integración e á normalización das súas condicións de vida. Así mesmo, a entidade conta cun centro de día - que recibiu recentemente unha axuda de 100.000€ da Deputación da Coruña - que facilita apoios e servizos diversos, a través de actividades funcionais e significativas de tipo formativo, terapéutico, ocupacional e lúdico do que se benefician 30 persoas con discapacidade intelectual. En concreto, no centro especial de Emprego xeran condicións laborais para a incorporación das persoas con discapacidade intelectual a un posto de traballo, levando a cabo cantas accións sexan adecuadas para ofrecer produtos e servizos competentes e de calidade dentro do mercado aberto nun marco de economía social. Deste xeito, os 48 traballadores adscritos a este centro, realizan tarefas de limpeza viaria, carpintería e escaiola e mantemento de edificios públicos. Aspaber xestiona na actualidade as concesións dos servizos de limpeza viaria nos concellos de Carballo, A Laracha e Malpica; a xestión do Punto Limpo da Laracha e o servizo de limpeza dos centros educativos de Carballo. Tamén realiza actividades complementarias como a fabricación de palets, de placas de escaiola para teitos e labores de manipulación para outras empresas como Conservas Calvo, Grupo Voz, Galopín ou Saika Pack. O delegado territorial da Xunta lembrou que a Xunta de Galicia mantén con Aspaber un concerto de 125 prazas no que investiu un millón de euros en 2016 e unha axuda ao Centro Especial de Emprego de preto de 150.000 euros. Novas relacionadas

• Aspaber renova a concesión do servizo de limpeza viaria de Carballo
• Aspaber recibe máis de 100.000 euros para a mellora do centro de día
• Aspaber, 40 anos como entidade Fóra de Serie
• Aspaber recolle en “Fora de serie” os seus corenta anos de traxectoria.

Fonte

• Redacción QPC (info@quepasanacosta.com)
• Xunta de Galicia