Os peques de Carballo son os primeiros en aprender sobre fragas con Senda Nova
Moi interesantes as Xornadas de Interpretación de Bosques que a entidade carballesa Senda Nova está artellando dende xa ata o 30 de marzo. Unhas xornadas que nos axudarán a comprender a complicada tesitura na que se atopan boa parte das fragas galegas, e que engloban visitas e charlas. Unhas xornadas que servirán para entender os factores que tanto inflúen na regresión do noso bosque máis cercano: O bosque atlántico.
Os primeiros que disfrutaron do programa e aprenderon a diferenciar as especies autóctonas foron os nenos e nenas do Colexio Bergantiños de Carballo a. O destino foi un dos espazos de masa autóctona mellor conservados da Costa da Morte: a Ribeira da Pena, entre os concellos de Carballo e Cerceda. Alí, no espazo vertebrado polo río Abelleira, os escolares carballeses puideron disfrutar in situ dun dos bosques máis importantes da bisbarra, unha aprendizaxe que parece tan básica e evidente pero que non se realiza no programa habitual de estudos.
Xornadas de charlas e visitas
As xornadas levarán unha expedición bergantiñá ata ao bosque atlántico máis occidental, as Fragas do Eume, na saída do 30 de marzo. Pero antes se celebrará o Día da Árbore o domingo 16, unha actividade tradicional dentro do programa anual de Senda Nova que leva anos de experiencia. Unha actividade que pretende achegar a través da plantación e apadriñamento de especies autóctonas, bós hábitos naturais entre a poboación máis nova.
Atentos estaremos aos faladores do sábado 22, con Evaristo Domínguez Rial no Forum Carballo, ou a propia charla sobre as Fragas do 29.
