Mércores. 25.11.2020
El tiempo

A Policía Local abre unha investigación polos vídeos da troula sen máscaras nun bar de Carballo

Captura do vídeo da polémica nun bar de Carballo
Captura do vídeo da polémica nun bar de Carballo
A Policía Local abre unha investigación polos vídeos da troula sen máscaras nun bar de Carballo
Domingo pola tarde en plena pandemia e co Concello de Carballo en nivel vermello por alerta sanitaria. Pero a vida axítase nun Bar da capital bergantiñá. A mocidade baila en parella e canta en grupos de amigas, facendo da máscara calquera cousa menos un elemento de prevención e protección ante o coronavirus.

Así o amosa uns vídeos que se subiron ás redes sociais, provocando que o whastapp da comarca ferva de comentarios. Unha situación que fai moito dano á hostalería carballesa, que está campeando o temporal como pode e con boa nota en xeral.

O propietario do local, Loureiro, lamenta o acontecido. “As cousas desbócanse un pouco e mira o que pasa… A evidencia está aí, é certo, pero parece que nós pasamos de todo e non é así. Chameilles a atención, dúas veces, e pararon, pero foron apenas 45 segundos e parece que foi toda a tarde". Loureiro non bota balóns fóra pero recoñece que hai veces que “parece que temos que ser papás da xente, dicíndolle unha e outra vez que ten que poñer a máscara, e que non poden estar máis de 6 xuntos. Nós temos perdidos clientes por ser pesados avisando á xente", explica.

Investigación da Policía Local

Fontes da Policía Local aseguran que están abrindo unha investigación, unha vez recibidos os devanditos vídeos. A Policía recibía unha chamada alertando da situación este mesmo domingo ás 19:45h, pero a única patrulla efectiva atopábase en Cances por mor dunha denuncia. Nese mesmo momento chamaron ao propietario, e lle preguntaron e pediron que tomase cartas no asunto.

Cando voltou de Cances, a patrulla voltou polo bar e a situación estaba controlada. Pero ao ver os vídeos a Policía Local entendeu que se trata dunha falta grave e procederon a abrir unha investigación, na que pretenden tomar declaración aos camareiros, identificar ás persoas que estaban bailando e cantando sen máscara, e valorar a posibilidade de precintar o local.

 

comentarios