Tras pasar na pasada edición do Carballo Interplay, vai camiño de Hollywood e, máis importante, das pantallas de todo o mundo. A serie Pulp Air, unha creación de Henfunk Studio, leva unha extraordinaria carreira dixital, e non para de recoller éxitos fóra das nosas fronteiras.

Dirixida pola directora coruñesa Anita Pico, esta comedia sobre unha divertida aerolínea galega, con base en Carballo, conta cun elenco con nomes como o coñecido cómico Pablo Meixe, que acumula millóns de visualizacións nas redes sociais, a actriz e presentadora Lucía Veiga, gañadora de dous Mestre. Premios Mateo, ou a moza Isabel Garrido, coñecida polos seus papeis en Acacias 38 ou El Desorden que Dejas. 
Tamén forma parte do elenco Alberto Abal, natural de Cee.

A serie, feita en galego, xa foi nominada a Mellor Idea de Proxecto en 2021 no Interplay, e de aí xa pasou por festivais de Alemaña, Panamá, Italia e Perú, ata cruzando o charco coa súa selección na XX edición de HollyShorts, un dos festivais máis importantes de Estados Unidos e nada menos que de Los Ángeles.

Aínda que aínda non está en ningunha plataforma online, posto que primeiro debe percorrer o circuíto de festivais, Pulp Air pode verse nalgunhas proxeccións concretas de Galicia, a última, recentemente, no último IV festival EntreCulturas do Concello de Culleredo.

PULP AIR (2024) | Serie dixital Trailer from Henfunk Studio on Vimeo.

Máis novas