A asociación Monte Pindo presenta o seu programa anual de actividades

07:09 31/01/18

Ainda que con posibles variacións, a asociación Monte Pindo Parque Natural vén de dar a coñecer o seu programa de actividades que desenvolverá ao longo deste ano. Todo o ano

Mesa de Toponimia do Monte Pindo. A comisión rectora da Asociación Monte Pindo acordou a creación dunha mesa de traballo destinada a recopilar e recuperar a microtoponimia do Monte Pindo para plasmar nunha guía e un mapa. Para inscribirse é necesario enviar un correo a [email protected].
Conmemoración do Ano Europeo do Patrimonio Cultural. A entidade celebrará as actividades deste evento de alcance europeo levando o patrimonio aos centros de ensino da bisbarra. Así, está previsto desenvolver ao longo do ano charlas informativas cando menos nos institutos de Carnota, Muros e Cee, da man dunha persoa experta nos valores patrimoniais do Monte Pindo e da comarca.

Febreiro

Durante o vindeiro mes de febreiro, está prevista a presentación do proxecto Trekker Monte Pindo, grazas ao cal a asociación mapeou para a aplicación Google Maps a práctica totalidade das rutas de sendeirismo do concello de Carnota. O acto incluirá a presentación do proxecto con Google, visita virtual polas rutas recollidas, e a proxección dun documental sobre a iniciativa. As datas marcadas para a presentación son o sábado, 24 de febreiro ás 18:00 horas na Domus Atlántica de Lira (dirixido ao público xeral) e o mércores, 28 de febreiro ás 11:00 horas no Hostal dos Reis Católicos de Santiago de Compostela (dirixido a prensa, entidade e TICs).

Marzo

Asemblea Xeral Ordinaria. Sábado 17 de marzo no Salón de Actos do Concello de Carnota. Pódese asistir en calidade de convidado/a preavisando á asociación.
5º aniversario do Irmanamento Monte Pindo - Monte Alto. Con subida ao Olimpo Celta desde as 10:00 horas, e á tarde-noite foliada e festa popular na praza da Solaina (O Pindo - Carnota). Prevese dispor de servizo de autobuses desde a cidade da Coruña.

Abril

Subida nocturna ao Monte Pindo. A asociación organizará unha subida nocturna da man de Fins Eirexas destinada a contemplar a bóveda celestial e aprender a facer fotografías astronómicas e nocturnas. Esta actividade, prevista inicialmente para a fin de semana do 14-15 de abril, depende estrictamente da dispoñibilidade de Fins e de que o ceo esté despexado polo que se aconsella estar pendentes da web da entidadade ou das súas redes sociais Facebook e Twitter por se hai cambios de última hora.

Maio

Roteiro micolóxico polo Monte Pindo. Da man de expertos da asociación ceense Pan de Raposo, os participantes descubrirán da existencia de cogomelos durante todo o ano, non só en outono. Tamén se tratará de localizar o lirio de monte (Iris boissieri); unha especie en risco crítico de extinción a nivel mundial que sobrevive no Monte Pindo. O mes pode variar en función da abundancia ou escaseza de cogumelos.

Xuño

Voluntariado no Monte Pindo (VIII). Limparanse un dos tres camiños do Monte Pindo que necesitan tarefas urxentes de conservación: Pindo-Pedra Cabalgada, Fervenza-Portela Ventosa e Penafiel-Cova da Xoana.

Xullo

VI Simposium Monte Pindo. Sábado 21 de xullo na Casa da Cultura de Cee. 6ª edición destas xa tradicionais xornadas de investigación e divulgación científica monográficas sobre o Monte Pindo que se desenvolven por primeira vez fóra do Concello de Carnota.

Setembro

Roteiro circular polo Monte Pindo. Desenvolverase o tradicional e exitoso roteiro circular, de certa esixencia física (unhas 8 horas de camiñada) percorrendo a práctica totalidade dos puntos de interese do Monte Pindo: San Xurxo, Penafiel, Cova da Casa Xoana, Laxe da Moa, etc...

Novembro

Día do Patrimonio. Participaremos un ano máis nas actividades que coordina a Rede de Patrimonio Cultural, da que formamos parte, en conmemoración do Día Internacional do Patrimonio, cunha visita guiada o sábado 17 de novembro aos restos do Castelo de Penafiel, da man dun experto.