Luns. 18.11.2019
El tiempo

A Costa da Morte tamén é Heredeira pola Forza

A Costa da Morte tamén é Heredeira pola Forza
Xurxo Ayan e Manuel Gago presentan en Carnota e Ponteceso o libro Heredeiros pola Forza - Foto- Sole Felloza

Non pode quedar ninguén esta fin de semana sen coñecer "Heredeiros pola forza", un libro de referencia, e de protesta, feito por dous dos pesos pesados da nova arqueoloxía galega: Xurxo Ayán e Manuel Gago. I é que esta fin de semana hai doble sesión de presentación, unha no norte e outra no sur da bisbarra.

A primeira será este venres 20 de xullo, as 20:30h na trastenda da libraría A Tenda dos Libros, de Ponteceso. Ademais, o sábado 21, e no marco das Barferencias arqueolóxicas de Carnota do innovador Proxecto da #TorredosMouros, poderemos velos no Salón de Actos do Concello de Carnota, ás 20:30h.
E se queremos ver o seu traballo a pé de cata, non temos máis que ir unha fin de semana polo Monte do Castro, en Lira, onde Gago e Ayán participan dende hai un mes nos traballos arqueolóxicos revolucionarios da Torre dos Mouros.

Polo de pronto, podedes ir vendo un capítulo do libro sobre... Dombáter.

Sinopse e obxectivo

O libro é unha chamada á acción para recuperar o noso inmenso patrimonio cultural no horizonte do século XXI. Ayán e Gago escolman en Herdeiros pola Forza vivencias de quince anos de traballo profesional desde a investigación e a comunicación cultural ao longo de todo o país, escribindo episodios que combinan a reflexión coa acción e un amplo anecdotario vivido e sentido en proxectos e iniciativas.

En Herdeiros pola Forza, Ayán e Gago avogan por transformar un modelo enquistado e esclerotizado de xestión do noso patrimonio cultural, devolvendo ás sociedades a relación coa súa propia memoria, e recuperando o sentido da nosa enorme herdanza e da nosa memoria. A sociedade galega do século XXI: urbana, usuaria das novas tecnoloxías e sometida a fortes procesos de tensión identitaria interna, precisa darlles novos sentidos ao patrimonio cultural.

Este libro está escrito desde a crenza en que a nosa sociedade está a cambiar con rapidez, e está converténdose, gradualmente, ela mesma, en protagonista dese proceso de recuperación.

Os autores

  • Manuel Gago é un xornalista que quere ser arqueólogo. Traballa como director de culturagalega.org e é profesor de ciberxornalismo na Facultade de CC da Comunicación en Santiago de Compostela. O tempo que lle queda libre dedícallo ao blog Capítulo Cero.
  • Xurxo Ayán é un arqueólogo que quere ser xornalista. Traballa no Instituto de Ciencias do Patrimonio do CSIC en Compostela. Edita o blog Arqueoneixon e colabora co portal Lg3 do Consello da Cultura Galega, o Xornal Certo e mailo Galicia Confidencial.

Por que Heredeiros? E por que pola forza?

Aquí vos deixamos, co señor Gago (xigante divulgador e comunicador) que nos explica un pouco o sentido deste libro:


Máis información

Novas relacionadas

Fonte

Comentarios