Abrindo novos sendeiros no Monte Pindo

Carnota

10:38 19/04/11

Unha ducia de persoas seguiron a convocatoria do sábado desafiando un sol de xustiza para, convintemente armados con fouciños e outros enseres de desbroce, reabrir un camiño tradicional que levaba moitos anos impracticable polos toxos e as xestas, e aproveitando para recoller a toponimia e as lendas da zona.

O tramo recuperado transcurre desde a Solaina do Pindo ata a Pedra Cabalgada, un impresionante monumento natural en forma de bolo granítico xigante que, cal estatua, parece suxeitarse en fráxil equilibrio cunha peana.

Se ben a xornada foi moi produtiva, deixou pendente unha segunda visita, na que sinalarán o roteiro axustándonos á normativa internacional de sendeirismo e abrirán o camiño de numerosas árbores caídas polos sucesivos incendios, o que converte varios tramos nunha auténtica carreira de obstáculos.

Nace o «pinding», un novo e esixente deporte

Unha vez alcanzado o destino na Pedra Cabalgada, tiveron folgos para continuar ata a Cova dos Morcegos, ascendendo a pulso por duras e escarpadas ladeiras inzadas de outeiros graníticos.
Esta esixente actividade física, que a retranca dos participantes deu en bautizar como pinding, levounos ata a máis grande das covas coñecidas no Monte Pindo, duns 15 metros de fondo e unha altura dunha persoa adulta, e que salvou a numerosos veciños da represión franquista durante a Guerra Civil.

E como colofón da xornada, unha inesperada recompensa

A anécdota máis simpática produciuse xa ao remate da dura xornada. Un xubilado, veciño do lugar, sorprendeuse ao ver aos camiñantes derreados e recobrando as forzas na fonte da Solaina, polo que preguntou de onde viñan. Nada máis descubrir que acababan de recuperar este sendeiro que case nin recordaba, agredeceu o traballo e quixo ser o primeiro en inauguralo cun paseo na grata compaña do seu can. Este é, sen dúbida, o maior premio que podemos agardar ao esforzo dos membros da asociación.