Volve Alfonso Blanco Quintela, profesor no IES Fontexería de Muros, lanzar un novo libro. Neste caso, acaba de publicar, na colección Terra Nomeada da Real Academia Galega, un libro sobre a toponimia maior do concello de Carnota, seguindo a saga que comezou co libro sobre Muros. Toponimia de Carnota (Terra Nomeada - RAG) fai un fermoso repaso pola realidade lingüística do concello.

O propio autor cóntanos como foi o desafío destacando que "a idea que me move a investigar a toponinia é un convencemento persoal de que coñecer as orixes dos nosos nomes de lugar é un apaixonante xeito de abrir portas ó noso pasado. E para min coñecer o noso pasado fai máis doado valorármonos como colectivo".

"O certo é que a toponimia de Carnota é un tesouro, como o é a de toda Galicia. Pero no caso de Carnota hai varios nomes de lugar únicos e enigmáticos (Nóutigos, Panchés, Lira...), o que me causou máis dunha dor de cabeza (que dou por ben sufrida)", cóntanos. "Ademais, está o caso do Pindo, que é un topónimo moi debatido, e ó que dediquei un esforzo especial coa intención de aclaralo".

"Por outra parte, chamoume a atención o ben documentados que están na Idade Media lugares como Adraño, situados na zona montañosa do concello. Isto é unha pista de que en tempos antigos a poboación se xuntaba en núcleos afastados da beiramar (de onde podían vir perigos), buscando a seguridade en puntos elevados, con boa visión do terreo e de acceso algo difícil. Isto contrasta coa tendencia dos tempos actuais de colonizar a costa".

Máis novas