Venres. 15.11.2019
El tiempo

Os Muíños de Caldebarcos volven sentirse vivos

Os Muíños de Caldebarcos volven sentirse vivos

Os Muíños de Caldebarcos van camiño de consolidarse como símbolo de recuperación das raíces máis auténticas da Romaría Tradicional. Ademais, a historia destes Muíños xa teñen unha data: Sábado 30 de Abril de 2011, día histórico en Caldebarcos. A ruta-romaría da que disfrutaron medio centenar de veciños e visitantes quedará na súa memoria e tamén na dos propios muíños, que volveron sentirse parte do pobo.

Foi completa a sesión. Pola mañá, a ruta polo Pindo desenvoleuse gozando das sorpresas que o monte ten aí desde sempre. Ademais, o que ten o Monte Pindo e que sempre hai cousas novas que descubrir. "Caemos na conta a cada paso, cando algún participante na ruta ve estes tesouros por primeira vez. Que marabilla!", describe un dos responsables da entidade Xurde Caldebarcos, César Cambeiro.

E como fixeran os membros da Asociación Monte Pindo, aproveitaron para sinalizar mellor a ruta. Así, cada veciño escribiu un cartel indicador para que todo o monte poida quedar sinalizado e que xa ninguén máis se perda, "nin con sol nin con borraxeira, e que calquera camiñante poida atopar calquera sitio. Bravo polas pintoras e pintores!!", claro que si.

Remata a ruta, e a xantar

A mediodía, tocou xantar coa comida que os veciños aportan e que fan coas receitas máis tradicionais. Pero ollo, tradicionais e modernas, que non deixan de aparecer novidades cos sabores naturais máis profundos, facéndonos posuidores dunha gastronomía aberta e en continua evolución.

A ritmo de Pregóns, Parrafeos e Coplas chega a merenda; a base de Papas de Millo, que adobiamos con Regueifas. Aí estaban chegados dende Bergantiños os regueifeiros máis devanceiros da nosa zona, Suso e Antonio de Xornes. Neles está todo o peso da tradición dos 4 bardos do verso que quedan na Costa da Morte, eles son os máis novos.

O colofón chegou da man da Queimada con dobre esconxuro, onde fixeron que "ouveen as bruxas e voen as fouces; e este ano ouvearon e voaron", asegura Cambeiro.

A sensación da familia de Caldebarcos é fantástica trala romaría. "Todo perfectamente ensamblado coma o encaixe de Camariñas", aseguran. "Pero hai que volver á terra, á realidade", reflexiona. I é que en sabendo onde estamos, a veciñanza de Caldebarcos segue agardando que "o Concello de Carnota se decida a botarnos unha man e, se non é moito pedir, que non contraprograme". Por eso piden que o Concello teña en conta á pequena aldea brava de Caldebarcos.

Novas relacionadas

Fonte

  • Información e fotos de César Cambeiro.

Comentarios