Publicabamos onte o sentido comunicado de preocupación das nais e pais de Cee e Corcubión indignadas polo retraso na incorporación do pediatra. Un comunicado no que se facía referencia a que as nais se enteiraban pola prensa do retraso, pois tiñan entendido que a incorporación se faría en maio e xa estamos en xuño.

Foi a alcaldesa, a unha pregunta no pleno pasado, o que anunciaba que o Sergas lle trasladara que ía haber un pequeno retraso, e por iso, Zaira Rodríguez, quere deixar claro que coincidiu o día no que se enterou do retraso co pleno, pero que en ningún momento tivo “mala intención” nin foi unha “artimaña” para non informar das novidades.

De feito, Zaira vén de reunirse esta mañá de mércores coas nais afectadas, que lle deixaron claro que en ningún momento intentaron acusar nin atacar á alcaldesa, pois teñen claro que a responsabilidade é do Sergas.

”Eu o que fixen en todo momento foi chamar ao Sergas para trasladar a preocupación que temos todas as nais e pais, e me incluo porque ademais de alcaldesa son nai”, indica. “Sabemos que Cee é dos Concellos que ten máis cupo, e a realidade é grave, pois non tiñamos un especialista de referencia para os nosos fillos. Aqui a praza de pediatría vense cubrindo nos últimos tempos sen estabilidade, pois é certo que non é unha especialidade que teñan moitas persoas e ademais hai outras que non queren, por motivos persoais ou profesionais, vir traballar a Cee”, explica.

Así, o pasado mes indicábanlle do Sergas que había unha persoa interesada en ocupar a praza, e que chegaría en maio. “Pero a semana pasada, xusto o dia do pleno, o responsable da área Ramón Ares dime que esta persoa finalmente remata a súa residencia en xuño polo que non podería incorporarse ata finais deste mes. Eu o que fago de intermediaria, trasmitíndolle a preocupación que temos, pero non podo facer nada máis”, sinala. “Pídolles desculpas ás nais se non as avisei tan pronto como me enterei, pero en canto o souben o anunciei tras a pregunta no pleno”, explícase. “Pero dende logo, non houbo mala intención nin artimañas para non informalas”.

”Eu sei que dende arriba están preocupados polo asunto, e esperemos que chegue a finais de mes. Eu tamén estou indignada, como alcadesa e como nai. Pero tampouco podo prometer nada, porque isto non depende de min”, sentenza.

Novas relacionadas

• 04-06-14: Pais e nais de Cee e Corcubión protestan polo retraso na incorporación do pediatra.
• 07-04-14: 1000 firmas por un servizo de pediatría decente para Cee e Corcubión.
• 26-03-14: Cee saíu unha vez máis á rúa a berrar pola Sanidade Pública.
• 24-03-14: O problema de pediatría de Cee chegará ao Pleno.
• 19-03-14: 1.500 nenos sen pediatra en Cee e Corcubión.

Máis novas

• Por unha aula para todos os cativos no CPI de Laxe.
• Artigo de Pablo Vaamonde: A privatización do Sergas.
• A Costa da Morte secunda a mobilización pola Sanidade Pública.
• A Costa organízase contra o repago sanitario.
• Case 4 anos de espera no Centro de Saúde de Fisterra.
• “Non ao recortes sanitarios”.
• 07-03-13: Preocupación veciñal ante a falta dunha enfermeira de pediatría en Muros.
• 24-07-12: Os recortes impiden que Laxe recupere o horario de Pediatría.

Fonte

• Redacción de QPC ([email protected]).