O pleno do Parlamento volve ratificar a non segregación das producións de enerxía e ferroaliaxes

Cee Dumbría Costa da Morte

O pleno do Parlamento volve ratificar a non segregación das producións de enerxía e ferroaliaxes

07:10 23/02/17

Traballadores de Ferroatlántica asistiron á sesión plenaria celebrada onte no Parlamento galego Onte volviu a haber pleno de control no Parlamento galego. E de novo, o caso Ferroatlántica saltou á palestra. Durante a sesión plenaria de onte, aprobouse a proposta socialista para reclamarlle ao goberno galego que evite a segregación das actividades de produción de enerxía e ferraleacións así como venda das centrais hidroeléctricas dos ríos Xallas e Grande. O Pleno reeditou así o acordo acadado na Comisión de Industria da pasada semana en base a unha iniciativa da deputada socialista Loli Toja. A deputada socialista dixo que as centrais son “o seguro de vida da comarca, se mire como se mire”, con 400 postos de traballo directos, explotan os recursos naturais, utilizan un terreo e uns recursos declarados de utilidade pública e dispoñen dun Porto –o de Brens- practicamente específico. Ademais Criticou a “falla de transparencia” do goberno galego e lamentou que para o PP esta aprobación sexa só "postureo", como asegurou un responsable do PP. “Postureo é medir a popularidade dunha persoa en base aos selfies”, lembrando as declaracións do secretario xeral do PP a un medio de comunicación nas que sinalaba que “el peso del presidente –Feijóo- en la política nacional se nota por la cantidad de selfies que se hace con todo el mundo”.

O Comite de Ferroatlantica con Feijoo e Ana Ponton

O Comité de Ferroatlántica con Feijoó e Ana Pontón ás portas do Parlamento

Ana Pontón advírtelle a Feijóo que se autoriza a venda das centrais asina a perda de 284 empregos na Costa da Morte

A portavoz nacional, Ana Pontón, propuxo facer unha fronte común de todas as forzas políticas para garantir o futuro de Ferroatlántica na Costa da Morte con dous puntos concretos. Por un lado, pechar a porta a calquera venda ou segregación das centrais do Xallas e, por outro, demandar da empresa que cumpra cos seus compromisos con Galiza en materia de emprego e investimento. A dirixente do Bloque levou esta cuestión ao pleno de control do Parlamento, despois de que a multinacional anunciase nun comunicado aos mercados internacionais, -datado en Londres o 1 de febreiro de 2017-, a súa intención de vender as centrais que ten en concesión para amortizar débeda. Pontón interpelou a Feijóo advertíndolle que, se como presidente da Xunta autoriza esta venda ilegal á multinacional, estará asinando a defunción das fábricas na Costa da Morte e a perda de 284 postos de traballo. “Por que levamos 60 anos deixando que Ferroatlántica teña gratis toneladas e toneladas de quilovatios de electricidade? Porque era a única maneira de garantir o emprego. Sen esas concesións a empresa non é viable e pecharía as plantas de Cee e Dumbría, desvincular a explotación eléctrica da industrial, - ademais de ilegal -, supón liquidar 284 empregos na comarca. Así de simple e así de duro”, explicou Pontón.

O texto da iniciativa aprobada

O Parlamento de Galicia insta á Xunta de Galicia a:

1. Esixir a empresa Ferroatlántica o mantemento da actividade productiva e dos postos de traballo na factoría de Cee-Dumbría a través das inversións necesarias para este fin. Traballar con Ferroglobe para conseguir o desenvolvemento dun Plan de modernización das súas fábricas en Galicia que conte co máximo respaldo social e sindical.
2. Velar polo mantemento das condicións establecidas nos documentos concesionarios vixentes das centrais hidroeléctricas con aproveitamento nos ríos Xallas e Grande, e moi especialmente as seguintes: - a) Non poderán segregarse de Ferroatlántica SA as actividades de ferroaliaxe e de producción de enerxía eléctrica polas centrais. - b) A perda por parte de Ferroatlántica SA da súa condición de titular dos aproveitamentos sinalados ante calquera acredor, memos pignoraticio, será causa de extinción destes nos termos establecidos nos documentos concesionarios.
3. Solicitar que os postos de traballo que se derivan da xestión, administración, contabilidade e explotación da división de enerxía, recaian no centro de traballo de Cee-Dumbría-Centrales Hidroeléctricas, como así foi desde sempre, na historia de Carburos Metálicos.