Aínda esta pasada fin de semana rescataron o proxecto Contos do Mar polo Pindo. E esta fermosa iniciativa que promove a recuperación do noso patrimonio inmaterial a través das historias da propia veciñanza, faise realidade desta volta en Corcubión.

Este sábado 21 de decembro ás 17h terá lugar a inauguración do proxecto Contos do Mar de Corcubión. Despois dunha serie de accións de colleita e gravación, ve a luz este traballo sobre memoria cultural participada polas xentes da vila que conclúe na creación dunha audioguía ficcionada a disposición para uso e desfrute da veciñanza e visitantes.

A xornada comezará no Cárcere Vello de Corcubión ás 17h coa benvida. De seguido, público asisente poderá desfrutar da estrea do paseo guiado que dura algo menos dunha hora.
A continuación, ás 18.30h rematará a xornada na Capela do Pilar cun pequeno coloquio sobre a experiencia a cargo de Maria Traveso de Promove e Xesús Ron de Chévere Teatro, ambos ao cargo da produción do proxecto. Estarán ademais acompañados polos participantes – informantes no desenvolvemento do proceso e pola Concelleira de Cultura Benestar Igualdade e Muller María Bella.

Polo de pronto podedes pasar por https://turismo.corcubion.gal/es/contos-do-mar e ir vendo os vídeos xerados na colleita patrimonial durante o mes de marzo deste ano, nos que os maiores da vila foron converténdose en contadores de historias de vida coas que trazar relatos de recuperación de vivencias biográficas vencelladas á vila que quedarían finalmente rexistradas nunha secuencia de vídeos coas que compoñer historias do pobo e da vila que non estan necesariamente recollidas en documentos oficiais.

Aquí vemos, por exemplo, a Dolores, da Olveira:

A partires destas xuntanzas foise tecendo tamén unha rede de informantes que foron apoiando con datos e recursos a investigación documental de Xesús Ron responsable do argumento e resolución formal da audioguía ficcionada que queda como obxecto de posta en valor da historia e memoria da vila.
A audioguía ficcionada componse duns auriculares que polas súas características técnicas crean unha atmósfera envolvente e íntima coa que ir percorrendo algunhas das partes da vila, no caso de Corcubión, acompañadas das voces dun narrador e narradora principais. 

Dende o concello piden que avisen para reservar o xogo de auriculares chamando ou acudindo á Biblioteca Municipal de Corcubión.
Asemade, a audioguía quedará dispoñible para o préstamo durante o Nadal en horario de apertura da Biblioteca

Este proxecto esta financiado polos Fondos Galp Costa Sostible, e colle o relevo dos xa creados en Fisterra, Carnota e Dumbría.

Máis novas