Venres. 29.03.2024
El tiempo

A Asociación Forestal de Galicia amosa a súa preocupación polo descoido da Xunta na xestión da madeira queimada

A Asociación Forestal de Galicia amosa a súa preocupación polo descoido da Xunta na xestión da madeira queimada

A semana pasada a Asociación Forestal de Galicia mantivo, en Dodro, unha reunión con comunidades de montes socias de Arousa, Barbanza e Costa da Morte. Unha cita que serviu para compartir a preocupación nas comunidades de montes polo descoido da Consellería de Medio Rural na xestión da madeira queimada sen valor comercial. Sinalan que tras a vaga de lumes de outubro, a Administración convocou axudas para a retirada da madeira non comercial co compromiso de resolver as solicitudes antes do 31 de xaneiro, pero os expedientes continúan sen resolver.

Tendo en conta o preto que está o inicio da época de alto risco de lumes, a partir do 31 de maio, “non se entende a lentitude da Administración en facilitar a corta e trituración desa madeira”. Ademais, “a Administración comprometérase o pasado outono a executar de oficio a retirada da madeira sen valor comercial que non puideran xestionar as comunidades, pero nada se volveu saber dese compromiso”.

A reunión serviu para deixar patente que o “sentimento das comunidades de montes de estar desatendidas por parte da Administración”. Os comuneiros criticaron “os bandazos que se están a dar na lexislación forestal (cambios nas distancias entre plantacións forestais e vivendas, por exemplo), sen que a Administración lles consulte aos propietarios forestais”. Os montes veciñais atópanse con esixencias normativas que, en moitos casos, é a propia Administración a que as incumpre, tal como acontece nas infraestruturas de comunicación que están baixo a súa xestión ou mesmo nos montes que xestionan en convenio, moitos dos cales se atopan nun “estado lamentable”.

Retirada

Desde a Asociación Forestal de Galicia considérase urxente acometer a retirada da madeira queimada non comercial para previr situacións de ‘selvatización’ do territorio e, como segundo paso, é necesario que a Administración poña en marcha un plan de rexeneración dos montes queimados. Estas esixencias serán un dos eixos principais da reunión que a Asociación ten solicitada coa Dirección Xeral de Ordenación e Produción forestal.

Falta de iniciativa

Tamén criticaron os comuneiros que non se puxeran aínda os medios e incentivos necesarios para crear unha cadea industrial que innove, creando gamas de produtos que deriven na apertura de novos mercados e así evitar que a produción forestal só alimente á industria do papel e taboleiro. Nese sentido faise necesario concienciar á sociedade da necesidade de consumir produtos derivados da madeira porque axudaría á mellora significativa dos nosos montes.

Novas relacionadas

Artigos sobre os incendios

Fonte

Comentarios