Apoio interxeracional para un envellecemento digno nas Casas do Maior
O proxecto cooperativista das Casas do Maior da Costa da Morte, ten novas aristas que pretenden dar resposta a dúas grandes necesidades do rural, a problemática do envellecemento poboacional e á ausencia de oportunidades de emprego para a mocidade.
Desta volta, a promotora familia de Colaxe vén de recibir unhas axudas no marco do programa “Acompaña 2.0: Voluntariaro interxeracional no medio rural”, que está permitindo que os usuarios das Casas do Maior da rede de cooperativas da Costa da Morte en Laxe, Camariñas, Coristanco, Cee, Mazaricos e Ponteceso, teñan visitas moi especiais, que as conecten coas novas tecnoloxías, pero tamén que as familias teñan unha mellor asistencia.
Este programa de envellecemento digno, permite ademais pechar o círculo, pois eses acompañantes son persoas formadas en Atención Sociuosanitaria na Escola de Tempo Libre Colaxe, e o feito de ser voluntarios permite gañar experiencias vitais, e coñecer as oportunidades de futuro do medio rural.
”Os obxectivos do proxecto son dar apoio interxeracional entre os voluntarios onde se enriquezan mutuamente, novos e maiores, a través da vivencia e intercambio de talento, experiencias vitais e de coñecemento”, explica Natalí Asorey, responsable de Colaxe. “Tamén dar acompañamento afectivo e transmitir coñecementos, tanto de envellecemento saudable como tecnolóxicos, aos maiores mediante unha economía de coidados baseada na atención na persoa mellorando a súa calidade de vida no rural”.
Así, este proxecto piloto de Talento Interxeracional que se desenvolverá ata novembro do 2023, farase a través dun sistema de parellas, que conte cunha persoa voluntaria de máis de 55 anos que titorizará a outra menor de 35. “Non só se trata de acompañalos durante unhas horas, senón tamén de intentar evitar as consecuencias negativas que estas situacións producen co paso do tempo: illamento, depresión, baixa autoestima... Perseguen promover un envellecemento digno e a asistencia ás familias de persoas maiores con dependencia”.
Permite tamén “axudarlle aos maiores a conectar co novo mundo dixital e ensinarlles a empregar todo tipo de ferramentas tecnolóxicas para que poidan, máis tarde, realizar eles mesmos as actividades do día a día, e ao mesmo tempo facerlles acompañamento afectivo”.
