Martes. 19.03.2024
El tiempo

Un Día especial para superar esta corentena co Trastorno do Espectro Autista

actividades para nenos con TEA
Unha marea de actividades na casa para manter activos os nen@s con TEA
Un Día especial para superar esta corentena co Trastorno do Espectro Autista

Este 2 de abril celébrase o Día Internacional do Autismo. Unha data que nos serve para concienciar da importancia de seguir loitando para coidar a toda esa rapazada que sofre un trastorno do espectro autista (TEA) e que esta corentena está sufrindo máis da conta. De aí que entendamos e respectemos a esas familias que poden sacar, un pouquiño, a eses nenos e nenos a respirar aire fresco e poder saír do encerro das catro paredes. Así o entendeu o goberno despois de dúas duras semanas sen poder saír.

Unha veciña da comarca recoñece que hai xente que os mira mal polas fiestra, pero en xeral a xente entende a situación. “O pequeno fai moita terapia en casa, pero nótase o poder saír 3 días a semana, despois de estar dúas semanas sen facelo”, explícanos a nai de Simón, que nos conta como levan este confinamento.

“Grazas ás súas terapeutas do Centro Impulso de Cee estámolo levando mellor pero é duro, para calquera neno, e máis neles que lles custa expresarse. Son nenos cun pensamento moi ríxido e controlan moi ben os días e as horas. Si sae un martes ás 12:00, pensará que o seguinte martes poderá saír, así que para que non seguimos ningunha regra nas saídas, facémolo de forma aleatoria. Paseamos polo bosque que hai á beira de casa, sen tocar paredes nin fiestras nin portas para que non necesitemos estar limpando e ao chegar a casa cambiámonos e lavámonos moi ben as mans”.

Piscinas de bolas orbis (que se inchan) para favorecer a estimulación sensorial, circuitos de carreiras, un columpio, xogos ata con espuma de afeitar… son algunhas das actividades que inventan para que as criaturas estean mellor.

#Desdemiventana

Para iso, comparte esta campaña que nace en Aragón, para visibilizar e apoiar a realidade TEA dende as nosas fiestras, poñendo un anaco de tela azul ou un molinillo.

Dia Mundial do Autismo 2 de abril

A vida cun cativo con autismo nun piso

Outro pai de familia cóntanos o día a día esta corentena:

”Pois intentamos manter unhas rutinas, que estes nenos o agradecen moito. Erguerse á hora de sempre, almorzar, xogar un ratiño, facer actividades específicas para traballar as carencias que teñen nenos coma el, ir a coller o pan (a única saída que facemos en todo o día), xogar un rato na terraza se o tempo o permite, comer, bañarse... En fin, temos o día estruturado para intentar non caer no desleixo de estar tirados en casa sen facer nada”.

  • QPC: É necesario saír da casa?

”Home, o noso cativo ten catro anos e é moi tranquilo, pero a rutina de ir a polo pan axúdao a interactuar con outra xente e cambiar de ambiente, que é esencial con eles.

  • QPC: Como se notou o cambio de ir ao cole a estar metido en casa?

Para nós o cambio de vida foi tremendo. De traballar os dous e os nenos ir a gardería e cole, pasamos a estar os catro metidos en casa todo o día. Ao principio o levaban ben, pero xa se lles va notando que están máis caprichosos, protestan máis cando pretendes facer algunha cousa que non sexa o que lles gusta... Co maior, o que ten TEA, tiñamos terapia tres días á semana e ía moi contento a “traballar”, ademais de ter reforzo no cole. Agora, cando intentamos facer un pouquiño do que facían con el, pásase todo o tempo queixándose. Estase empezando a acomodar e iso a verdade é que nos preocupa bastante”.

  • Como vos vedes de aquí a uns días ou semanas?

Preferimos non pensalo. Considerámonos afortunados por poder gozar dunha terraza ampla e dun tempo suficientemente bo como para que os nenos xoguen aí. Esperemos que poidamos manter a rutina que temos por agora e, sobre todo o noso fillo autista, sigan mantendo horarios e non nolo poñan moi difícil. Moito ánimo para toda a xente que ten nenos máis movidos ou que están en sitios pouco acondicionados. Sairemos desta”.

Comentarios