Do Rivés estrea "Contrabando": Pandeireta crúa e identidade da Costa da Morte
Do Rivés vén con novidades. A banda de “trad” formada polas bergantiñás Jenni Felpete Iglesias, Hadri Felpete Iglesias, Alba Freijeiro Senande, Elena Verdes Veiga e a muxiá Paula Vilela Vigo publica este sábado 23 de maio o seu primeiro traballo discográfico. "Contrabando" é un álbum que nace da tradición oral da Costa da Morte e que sitúa a pandeireta, a voz colectiva e o baile no centro da súa proposta musical.
O disco aposta por unha sonoridade crúa e directa, na que a interpretación reduce ao esencial os elementos sonoros para reforzar a forza rítmica e colectiva da música tradicional. A pandeireta convértese así no eixo principal dun traballo que dialoga co repertorio popular desde unha perspectiva contemporánea.
A voz das artistas ademais incorpora trazos dialectais e formas propias da Costa da Morte, un falar natural fundamental no proceso de identificación da mocidadade galega con outras propostas máis trapeiras.
A dimensión estética de "Contrabando" acompaña esta proposta musical cunha forte conexión visual coa Costa da Morte. As imaxes do proxecto foron realizadas en espazos naturais da costa, establecendo un vínculo directo coa paisaxe como elemento identitario.
As integrantes aparecen vestidas de negro, con encaixes e elementos téxtiles tradicionais, xunto con detalles como cordas que reforzan unha estética baseada na materia, no traballo manual e na relación co territorio. A proposta visual dialoga así coa música desde unha mesma idea de raíz, corpo e paisaxe.
