Alumnos do IES Monte Neme que marchan de Erasmus Alumnos do IES Monte Neme que marchan de Erasmus a facer prácticas

Por experiencia propia dicimos que a experiencia Erasmus é a mellor que pode disfrutar un novo adolescente mentres cursa os estudios, antes universitarios pero agora tamén de FP. Desta volta serán 8 alumnos carballeses dos ciclos formativos do IES Monte Neme os que darán envexa aos seus compañeiros facendo as prácticas no estranxeiro, no marco do programa ERASMUS +.

Un ano máis, o centro carballés entra no proxecto europeo Erasmus + “Europa, Next Station: Vocational Training Network”, no que están inscritos 19 Centros Integrados de Formación Profesional de Galicia e 18 Institutos de Educación Secundaria que ofertan ensinanzas de formación profesional.

O proxecto supón a posibilidade de que 344 alumnos e 44 profesores de formación profesional de Galicia poidan facer prácticas, desde setembro de 2014 ata xuño de 2016, en diferentes países da Unión Europea: Alemaña, Finlandia, Polonia, Italia, Portugal, Francia, Malta, Países Baixos, Irlanda e Reino Unido, entre outros. 8 serán carballeses.

Os alumnos pertencentes aos Ciclos Medios de Xestión Administrativa, Mecanizado, Instalacións Eléctricas e Automáticas e Instalacións de Telecomunicacións comezarán as prácticas no estranxeiro na primeira semana de abril. Os países de destino nesta ocasión serán Malta, Polonia e Portugal.

Os estudiantes Iván Bermúdez Taibo do CM de Xestión Administrativa e Adrián Vázquez Rojo, do CM de Instalacións de Telecomunicacións, realizarán as súas prácticas en Wroclaw (Polonia). Andrés Camilo Gómez Chica, do CM de Mecanizado, e Ricardo Lamas Liñares, do CM de Instalacións Electrotécnicas e Automáticas cursarán o módulo de FCT en Malta, mentres que Antonio García Lavandeira e Alexis Rodríguez, do CM de Instalacións de Telecomunicacións, e Alejandro Rey Cabeza e Rubén Barreira Castiñeira, do CM de Instalacións e Electrotécnicas e Automáticas viaxarán a Portugal.

Baixo este mesmo proxecto, este ano, catro profesores do IES Monte Neme realizaran unha estadía formativa no estranxeiro, ca finalidade de visitar centros educativos e empresas durante unha semana.

Fantásticas prácticas

As prácticas de formación no estranxeiro terán unha duración de 10 semanas, obtendo o mesmo certificado que ao facer as prácticas de FCT (Formación en Centros de Traballo) en Galicia, pero con todas as vantaxes que ten coñecer outra cultura e outra forma de traballar, obtendo así un valor engadido á súa formación.

Baixo este proxecto, o ano pasado, un alumno do Ciclo Medio de Xestión Administrativa do IES Monte Neme, Rubén Pombo Bardanca, realizou as prácticas en Malta. A estadía formativa que realizou nunha empresa de dito país supuxo unha experiencia positiva e moi enriquecedora, que lle permitiu avanzar no coñecemento de idiomas ademais de poñer en práctica os coñecementos adquiridos no ciclo formativo.

Fonte

• IES Monte Neme.