Setembro chega con forza á #AxendaCostadaMorte

08:15 31/08/18

A #axenda da Costa da Morte despídese hoxe dun intenso mes de agosto no que houbo actividades para todos os gustos sendo as verbenas unha das citas claves do mes. E continúano sendo en setembro, polo menos durante estes primeiros días, que ao cadrar en fin de semana son moitas as localidades que continúan de festa. Antes de ver unha a unha, repasamos o parte costeiro para esta fin de semana da man de Meteogalicia.

Meteogalicia

Estamos ante un novo anticiclón que se queda ata o domingo polo que teremos un aumento progresivo na estabilidade atmosférica. Os ceos estarán durante hoxe, mañá e o domingo moi despexados onde a presenza do sol e as boas temperaturas están aseguradas, chegando aos 30 graos nalgúns puntos da Costa da Morte. Durante estes tres días tamén terá moita presenza o vento que soprará do nordeste con intensidade moderada, que nalgúns momentos pode chegar aos 40 ou 50 quilómetros por hora o cal pode minimizar a sensación térmica. En canto ao mar, este vento do nordeste deixará algo de maruxía con escaso mar de fondo.

Festas

Festas en Baíñas. Na parroquia de Baíñas celebran esta fin de semana as festas do patrón con tres días cargados de música.
Festas en Nantón. En Nantón, no concello de Cabana de Bergantiños, celebran hoxe e mañá as festas do Carmen.
Festas de san Ramón de Serres. Tamén hoxe e mañá celébranse as festas de San Ramón de Serres, en Muros. Mañá sábado, ademáis da música, tamén haberá unha exaltación da navalla.
Festas de San Ramón de Vigo-Mallas. En Vigo-Mallas (Fisterra) celebran estes tres días as festas do San Ramó na que non faltará a música nin a diversión infantil.
Festas do Santísimo Cristo de San Mamede. Tamén en San Mamede, Carnota, teñen por diante tres días de festas na honra do Santísimo Cristo.
Festas da Milagrosa. No barrio da Milagrosa, en Carballo, comezan o mes de setembro con festa. Hai programados unha gran cantidade de actividades para mañá e para o domingo.
Romería das Neves de Buxantes. En Buxantes celebran mañá a romaría das Neves con sesión vermú, churrascada e verbena. A festa regresa o día 8.

Outras citas

Arte e Vermú na Casa das Pepitas. A Casa das Peritas, obradoiro da artista Natasha Lelenco na aldea de Mallas, en Fisterra, pecha esta fin de semana as súas portas como ocasional galería de arte. A exposición poderá visitarse hoxe, mañá e o domingo entre as 12:00 e as 14:00 horas.
Mercado de San Ramón do Allo. Coincidindo coa romaría de San Ramón, a parroquia de O Allo (Zas) recupera hoxe o seu tradional mercado no que faltarán os productos de artesanía. Os postos abrirán entre as 11:00 e as 15:00 horas.
Carballo na memoria. O casino de Carballo acolle esta noite, a partir das 20:30 horas, unha viaxe no tempo a través das imaxes seleccionadas polo cronista Xan Frag no seu último libro titulado "Carballo, o paso do tempo".
Inauguracion do paseo fluvial de Vimianzo. Esta noite Vimianzo inaugurará o seu paseo fluvial "Braña do Cura" cun acto que comeza ás 20:30 horas.
Presentación literaria en Laxe. O museo do Mar de Laxe acolle hoxe, ás 20:30 horas, a presentación do libro "Na procura da noite: fotografando o ceo nocturno" editado pola Universidade de Santiago e do que é coautor Jorge Mira.
Dia da Bici en Corcubión. Corcubión celebra mañá o día da bici cun percorrido que arranca ás 11:00 horas e que discorrerá polo municipio.
Iluminación nocturna na Fervenza do Ézaro. Mañá sábado, a fervenza do Ézaro volve a iluminarse entre as 23:00 e as 00:00 horas.
Noite de estrelas e mitos no faro de Brantuas. Mañá ás 21:00 horas sairá dende a praia da Ermida unha ruta nocturna de tres horas aproximadas de duración.
XXIII Festa dos maiores en Cee. O pavillón municipal de Cee acolle este domingo, a partir das 13:30 horas, a festa dos maiores organizada polo concello.
Concerto de música folklórica suiza. A praza da Constitución de Fisterra acolle este domingo, 2 de setembro, a partir das 19:00 horas un concerto de música folkórica suiza na que se tocarán instrumentos como o yodel, a trompa alpina e o acordeón suizo.

Exposicións

Castelo de Vimianzo. A fortaleza así como a súa mostra de artesanía ao vivo pódese visitar martes a domingo de 10:30 a 14 e de 16 a 19 horas.
Conxunto etnográfico do Mosquetín. O conxunto de muíños e batáns do Mosquetín abre as súas portas todos os días da semana dende as 11 horas ata ás 18 horas. Os sábados e os domingos hai visita guiada ás 13 e ás 18 horas.
As Torres do Allo, en Zas, abre todos os días durante os meses de verán (de 11 a 19 horas). Ademais, o pazo ofrece visitas guiadas gratuitas ás 13 e ás 17 horas.
No dolmen de Dombate ofrécense visitas guiadas, en temporada baixa, de venres a domingo de 10:30 a 14:00h e de 16:00 a 18:30. En temporada alta (Semana Santa, e do 1 de xullo a 16 de setembro), visitas guiadas todos os días.
Faro Vilán en Camariñas. O faro Vilán acolle durante todo o mes de setembro a exposición “M’eu – Mar. Tempos longos” de Xan Vieito. Os horarios de apertura da sala de exposicións so o 1 e o 2 de setembro, de 11:00 a 21:00 hoas e do 3 ao 30 de setembro de 11:00 a 14:00 e de 15:30 a 20:00 horas.