Luns. 14.10.2019
El tiempo

As anécdotas de 454 naufraxios na Costa da Morte nun libro

As anécdotas de 454 naufraxios na Costa da Morte nun libro

Xa está nas librerías un novo libro que ten a Costa da Morte como protagonista. O vindeiro venres 27 de xaneiro, ás 20:00h da tarde a Pousada de Loló de Muxía acollerá a presentación do libro "Costa da Morte, un país de soños e naufraxios". Un libro que presenta o escritor vimiancés Rafael Lema, un histórico en materia de naufraxios.
Ademais do autor estarán presentes o investigador naval coruñés residente na Laracha, Fernando Patricio Cortizo, xa coñecido pola Costa trala súa participación nas Conversas mariñas de Corme, e o presidente do Gac 3 Evaristo Lareo, pois este traballo foi editado polo Grupo de Acción Costeira GAC 3 Costa da Morte.

Os 500 naufraxios da Costa da Morte

O libro é unha catalogación e estudo dos naufraxios sucedidos entre Caión e o cabo Fisterra, na Costa da Morte coruñesa, desde a Idade Media ata hoxendía. En total recóllense as crónicas e anécdotas de 454 barcos documentados neste tramo.

Sinopse

O libro divídese en 6 capítulos a modo de travesías mariñas, describindo os naufraxios sucedidos en cada unha dos tramos costeiros analizados, que son: a contorna de Baldaio ás illas Sisargas, Corme- Laxe, Camelle-Arou, cabo Vilán, cabo Touriñán, cabo Fisterra.
Ao final acompáñase un catálogo de naufraxios na Costa da Morte e a cita dos sinistros marítimos acontecidos tamén no resto da costa galega.
A obra, de 256 páxinas, inclúe máis de 300 fotografías e ilustracións nun traballo deseñado por Gende Estudo de Carballo.

Ademais dos capítulos divulgativos dedicados ao reconto dos naufraxios incorpóranse anexos documentais sobre os baleeiros na Costa da Morte, os mitos e ficcións sobre os naufraxios e a lenda negra dos raqueros, memoria de corsarios, accións de submarinos alemáns nas dúas guerras mundiais e crónicas históricas de batallas e flotas de galeóns. O traballo achega numerosos datos novos sobre accidentes mariños, analiza os anteriores recontos e distintas versións sobre coñecidos sucesos, incorporando documentación para desterrar e desmentir a lenda negra da existencia de mafias organizadas na comarca para provocar naufraxios e desvalixar barcos.

Como para perdérmolo.

Novas relacionadas

A Cara máis íntima do naufraxio

Máis novas de Naufraxios

Artigos relacionados

Fonte

Comentarios