A oferta cultural da última fin de semana do mes de xaneiro está protagonizada polas exposicións tanto temporais como permanentes que enchen de vida as paredes de emblemáticos edificios da Costa da Morte. Artesanía, mar, naufraxios,... son algunhas das temáticas que se poden ver nunha fin de semana que, segundo o parte costeiro de 4gotas.com, virá pasada por auga. Hoxe unha fronte deixará chuvias boa parte do día, con algún refacho forte de vento durante a tarde. Mañá, as chuvias concentraranse no interior e no litoral entre Muxía e Muros, quedando o litoral máis norte da Costa libre de auga. Na madrugada e na mañá do domingo soprará forte o vento do suroeste (80-90 km/h) e unha nova fronte deixará chuvias durante gran parte do día. Ademais, as chuvias chegan para quedarse o que queda de mes e febreiro comezará con algún temporal de chuvia e vento pola Costa da Morte. Exposicións 

• O pazo da Cultura de Carballo acolle dende hoxe e ata o vindeiro domingo 19 de febreiro a exposición "Un mar de sensacións". Chiña e Mon Lendoiro recompilaron os poemas publicados polo Semescom no ano 2012 para darlles forma plástica. Hoxe, ás 20:30 horas terá lugar o acto de inauguración. A mostra pode verse todos os días en horario de 17 a 21 horas.
• A casa de Man de Camelle acolle unha exposición de pintura naval. Baixo o título "Costa da Morte. Naufragios" Rosa Pereda e Rafael Lema recuperan as historias dos naufraxios máis importantes acontecidos nas augas da bisbarra. A inauguración terá lugar mañá sábado ás 12 horas.
• A tenda Stoupa (siuada a 100 metros do cemiterio vello de Cee) acolle unha exposición escultórica do ceense Manuel Canosa. Pode visitarse de martes a sábado en horario de 11 a 14 horas e de 17 a 21 horas e os domingos de 11 a 14 horas.
• Castelo de Vimianzo. A fortaleza así como a súa mostra de artesanía ao vivo pódese visitar todos os días da semana en horario de 10:30 a 14 horas e de 16 a 19 horas.
• As Torres do Allo, en Zas, abren todos os venres, sábados e domingos de 11 a 19 horas. Ademais, o pazo acolle unha mostra de pezas de Olería de Buño.
• O faro Vilán acolle ata o 26 de febreiro a exposición “Casa de Luz, grabados” de Mariano Castillo. Pode visitarse en horaio de 11 a 14 e de 16 a 18:3o horas.
• No dolmen de Dombate ofrécense visitas guiadas todos os días de 10:30 a 14 e de 16 a 18:30 horas.

Outras citas

• O grupo de música folk Samarúas - composto por mozos e mozas da Costa da Morte - presenta hoxe o seu 1º videoclip - "Non" - na Fnac da Coruña. O acto terá lugar ás 19 horas na praza de Lugo.
• Charla sobre Urugay en Carballo. O pazo da Cultura de Carballo acolle hoxe, ás 20 horas, unha conferencia a cargo de Marcelo Boado que falará sobre "O Uruguay actual desde a socioloxía".
• Monólogo en Cee. O pub Palacín de Cee acolle este domingo a actuación do "Padre Merino". A cita comeza ás 20:30 horas.

  Fonte

• Redacción QPC (info@quepasanacosta.com)