O mes de xullo chega con forza a #AxendaCostadaMorte. As verbenas e os festivais alternativos van collendo o protagonismo das noites do verán que se fai de rogar, climatoloxicamente falando. Antes de entrar de cheo nas principais citas para esta fin de semana na Costa da Morte, facemos un repaso polo parte costeiro de 4gotas.com. Tralo paso dunha fronte moi desfeita, de cara a fin de semana recuperarase de forma paseniña a influencia anticiclónica. Durante a mañá de hoxe quedarán moitas nubes que lle darán paso a partir do mediodía - sobre todos ao sur de Fisterra - a grandes claros aínda que apenas subirán as temperaturas. Mañá o día amencerá con nubes nos arredores de Malpica e néboas en zonas do interior como Vimianzoe  Zas. O sol xa brilará entre Fisterra e Muros. A media mañá xa lucirá o sol en toda a Costa da Morte e comezarán a subir un chisco as temperaturas. Será o domingo o día máis estival da fin de semana con temperaturas propias do verán e moito sol. O vento tamén acompañará a xornada dominical polo que haberá que buscar areais abrigados para desfrutar dun día de praia. Asalto ao Castelo  Vimianzo revive estes días os seus tempos pasados coa festa do Asalto ao Castelo. Os locais de hostelería ofrecen dende o martes os peculiares pinchos irmandiños e os máis pequenos participan en obradoiros relacionados coa revolta irmandiña. Hoxe, terá lugar a VII Cea Medieval no Foso do Castelo e partir da unha da madruga Quempallou encargarase de amenizar a noite. O día grande será mañá que arrinca coa feira artesanal, na praza do concello. Ao longo do día haberá varios obradoiros, visitas guiadas teatralizadas, pinchos irmandiños nos locais de hostalería,... e ás 16:30 horas os máis pequenos faran o seu propio Asaltiño. A praza do concello acolle ás 18:30 horas o concurshow de traxes medievias e un pouco máis tarde coñecerase o fallo do IV concurso de Fachadas. As irmandades parroquiais da Terra de Soneira concentraranse ás 19:30 horas na praza do concello para izar a bandeira irmandiña. A música continuará polas rúas de Vimianzo ata as 22 horas que se trasladará ao Castelo co comezo do concerto. Ses é a encargada de abril o cartel antes de que as tropas asalten a fortaleza, que será a iso das 23:30 horas. A festa continuará con Celtas Cortos, Firkin e Spin Te Kú . Os actos do Asalto ao Castelo rematan o domingo, cun paseo teatralizado polo Castelo e coa sesión vermú a cargo de Medio Quinhón na praza Castelao. Festas

• Continúan as festas do San Pedro na Ponte do Porto. Hoxe toca sesión vermú coa orquestra Principal, que tamén estará pola noite con Ritmo Xoven. Para o sábado serán Verano Azul e SuperFama as que poñan a nota musical, mentres que o domingo aínda queda por confirmar unha Gran Orquesta.
• Santa Comba ponlle hoxe fin a catro días de festa en honor a San Pedro. Diso encarganranse Boys Machine e macrodisco CDC.
• O porto de Muros acolle hoxe, a partir das 22 horas, a II Noite de Rock da Sala Nasmo. Actuarán as bandas locais Reacción, Archivo Adxunto e Os Desterrados e como cabeza de cartel estarán RIFF RAFF.
• A parroquia coristanquesa de Oca celebra mañá e o domingo a festa do Corpiño. Haberá misas durante os dous días e tampouco faltará a música.
• En Coucierio (Muxía) vivirán esta fin de semana as festas do Socorro. Esencia Orquesta e Blue Start encargaranse da parte musical de mañá. Mentra que o domingo a festa estará amenizada por Esencia Orquesta de novo.
• En Freixeiro, Santa Comba, celebran este domingo a Virxe do Carme. Ademais da misa haberá sesión vermú e verbena a cargo da orquesta Brujas.
• A parroquia vimiancesa de Tines honra mañá a San Antonio. Despois da procesión pola vila, haberá misa a iso da unha da tarde que lle dará paso á sesión vermú amenizada pola orquesta Panamá Band, que compartirá escenario á noite co dúo Almirante.

Exposicións e visitas guiadas

• Vimianzo: Todos os sábados e domingos, o concello de Vimianzo ofrece visitas guiadas gratuitas por dous dos seus espazos turísticos máis visitados: o castelo e os batáns do Mosquetín. Na fortaleza hai dúas visitas guiadas ao día; unha ás 12 horas e outra ás 16 horas. Mentras que nos batáns son ás 13 e ás 18 horas.
• Zas: o pazo das Torres do Allo abre todos os días, de luns a domingo, en horario de 11 a 20 horas. O vindeiro 10 de xullo comezan as visitas guiadas teatralizadas da man dos Quinquilláns.
• A sala de exposicións do Faro Vilán, en Camariñas, acolle dende mañá sábado e ata o 3o de xullo a exposición de pinturas "Mar de dudas" de Gosia Trebacz.

Outras citas

• En Carballo poñenlle este domingo o broche final ás celebracións do San Xoán coa festa do Bosque. Centos de familias e pandilla de amigos reuniranse para comer, cantar, esocitar música e convivir no bosque do Añón. Pola tarde terá lugar a tradicional baixada de Barcos de Papel.
• O domigno, a iso das 11 da mañá, partirase dende o Fieiro para subir ata o alto da Moa de Monte Pindo e unha vez alí participar na I cata de viño ribeiro.