Por fin temos unha fin de semana de praia na Costa da Morte, pero como nos contan os amigos de 4gotas, sempre con matices!!
A xente de Malpica e arredores para poder gozar da praia deberá desprazarse ao sur da Costa. A zona de Corcubión e Cee será a que goce de mellor tempo esta fin de semana.
O venres irá bastante calor, con máximas nesas zonas aorredor dos 30ºC. Nos arredores de Malpica haberá nubes (máis ben, néboas) na mañá e na noitiña e ademais con vento do nordés as máximas non pasarán dos 24ºC.
O sábado seguirá a calor na parte sur, pero con máis vento, as temperaturas baixarán uns 2-3ºC. Repetiranse as néboas na mañá do sábado nos arredores de Malpica.
O domingo será un día moi semellante ao sábado, con menos néboas no norte, pero con ese vento que non deixará pasar dos 22ºC en Malpica fronte os 27-28 de Corcubión, por exemplo.

Unha axenda completa

Menuda #AxendaCostadaMorte a que temos estes días. Festas, feira medieval, libros, folclore, blues, monólogos, andainas…

Así e todo, as primeiras que destacamos son as dúas xornadas de Limpeza de praias convocadas para Quilmas e Lires. Sesións ecolóxicas e medioambientais para coidar o noso entorno natural. E nesa liña, destacamos a Andaina ata a Fervenza de Castriz que artellan en Santa Comba.

Pero temos moitas máis cousas, e as Festas xa comezan a ser protagonistas. Teremos as Festas do Pilar de Suxo, os Remedios Vellos de Lira, as Festas de San Antonio en Xaviña, e o domingo arrincan as Festas de San Adrián de Toba.
E tamén en clave festexeira, pero desta volta polos pubs, a Festa da Primavera do Atallo do Muxo de Muros.

Ao longo da fin de semana veremos tamén como se porta o primeiro Mercado Medieval de Carballo, que convertirá o Barrio da Milagrosa nunha feira xeitosa, con postos de artesanía e gastronomía.

Unha das citas, sen dúbida da fin de semana, será a actuación de Pablo Carbonell na Ventana de Laxe, unha ocasión única.

Tamén vai de libros a cousa. Por Fisterra estará o creador dun método de aprendizaxe de chinés Anxo Pérez co seu “88 peldaños do éxito”. Ademais, Suso Bahamonde segue expandindo o seu segundo libro, con poesía, e música, e teremos presentación de Expansión o venres no OviOvar do Ézaro, e o sábado toca en Corcubión.

Para concerto, o que van protagonizar dous grandes da volta, como son Rafa Mississipi & Javi Turnes facendo soar a “Armónica Lewinski” no Colonial Café de Cee.

Teremos música e baile tradicional, co Festival Folclórico Nemeth en Carballo, p Festival Folclorico en Santa Comba e a actuación do grupo de danza local en Vimianzo.

Precisamente en Vimianzo pechamos, coma sempre, a fin de semana, coa representación da Escola Municipal de Teatro na tarde do domingo.

Máis información

• www.axendacostadamorte.com.

Fonte

• Redacción de QPC ([email protected]).