Análise e resultados dunha fin de semana quente no fútbol da Costa

Análise e resultados dunha fin de semana quente no fútbol da Costa

21:43 15/06/14

Nova fin de semana chea de emocións, e calor, no Fútbol da Costa. Unha fin de semana especial para QPC, pois este domingo estivemos no Galicia en Goles Fin de semana promocionando a III Gala do Fútbol da Costa e mais sorteando un Álbum completo. Sorteo que, por certo, levou o noso amigo Wash Calvo. Parabéns para el, pois malia que xa tiña o seu rematado, seguro que atopa un sobriño ao que regalarlle este tesouro.

Imos repasando as competicións que aínda quedan en liza.

Copas da Costa

Intensos os derbis das semifinais Copa da Costa. Dous partidazos xogados cunha abafante calor no que o Cee puido aguantar a todo un Dumbría mentres que o XSC tivo un pouco máis que o Castriz e leva unha renda que pode ser moi válida para a volta en Fontenla.

E impresionantes tamén as Semifinais da Copa de Veteranos. Cunha relativa sorpresa ademais, pois o Erbecedo deu conta na casa dun dos favoritos, o Soneira. Ademais, o Zas e o Dumbría empataron sen goles e o deixan todo para a volta. O martes traeremos a crónica completa.

Escándalo na Fase de Ascenso á 1ª

Tremendo o asunto da Promoción de Ascenso. O Sofán emitía un duro comunicado esta semana ante unha situación na que o Val do Ulla sumou 9 puntos en 3 partidos, dous deles nos despachos. Esta semana, o cadro carballés fixo os deberes, e venceu en Sálvora, estando agora obrigado a convertir a vindeira fin de semana o Carral nun fervedoiro pois ten que vencer por, alomenos, 3-0 ao Val do Ulla.

Fases de ascenso base

Logo do ascenso do XSC Cadete, quedan 2 equipos en liza. E unha de cal e unha de areal para ambos. O Dumbría Xuvenil comezou de xeito impecable en Viveiro, cunha vitoria pola mínima, e está a 3 pasos do ascenso. O que case que dixo adeus ao ascenso foi o equipo ceense de infantís, que caían por 0-3 ante o Rayo Sadense e moito terán que cambiar as tornas para superar esta semifinal.

E temos que felicitar ao Dumbría Infantil, que conseguíu manter a categoría na Liga Galega, ao empatar co Xuv. Oroso, o que era o seu rival directo. O cadro de Pablo Conde seguirá un ano máis en categoría autonómica, demostrando o potencial dumbriés, cun equipo cadete na máxima categoría e un cadro xuvenil pelexando polo ascenso á Liga Galega.

O Cabana comanda as Ligas Biberóns Norte

E esta fin de semana decidíronse as Ligas Benxamín e Alevín Norte que determinarán ademais os finalistas na I Copa dos Biberóns. Así que xa temos os 8 equipos de cada categoría que estarán o día 21 en Outes.
Ademais, temos campións do Norte, e foi o Cabana o campión de Alevíns, a pesar de ter que descansar esta xornada, aproveitándose da derrota do Vimianzo ante o Coristanco. Un Coristanco ao que lle valeu a vitoria para meterse na Fase Final da Copa.
Con Cabana e Coristanco tamén estarán na Final de Copa Alevín, Vimianzo e Corme, que se enfrontarán aos 4 primeiros do Sur, o campión, Dumbría, cos Fisterra, Outes e Os Miúdos A.

Ademais, en Benxamíns, no Sur xa estaban listos, o campión Outes, e os Fisterra, XSC A e Os Miúdos A. Agora, co título do Cabana listo dende hai varias xornadas, estarán en Outes o Sofán, o Corme e o Coristanco.