Balonmán: Triple vitoria costeira e un bus ao Rosal que vale unha Liga

Balonmán: Triple vitoria costeira e un bus ao Rosal que vale unha Liga

14:50 24/04/18

Triple vitoria esta semana para o balonmán costeiro. A nova vitoria do Calvo Xiria ante o SAR na casa deixa aínda a porta aberta ao título. Xa ca Fase de Ascenso á División de Honra B asegurada, os carballeses viaxan este vindeiro sábado ao Rosal, a enfrontarse precisamente ao líder, un At. Novás que non falla. Os verdes fletarán un bus, así que xa podedes ir reservando praza para animar á marea. Mentres, o Balonmán Camariñas volvía recuperar sensacións cunha vitoria ante o pechacancelas que o afianza nunha cómoda 13ª praza, e deixando defintivamente fóra do alcance aos seus perseguidores a falta de 2 xornadas. Os que tamén sumaron unha importante, sobre todo moralmente, vitoria foron os do Bm. Xallas en Ferrol. Uns puntos que deixan aos xalleiros na 10ª praza.

1ª División Estatal Masculina, x.28

Resultado: Calvo Xiria – S.A.R. Plastic Omnium (22-20)
Calvo Xiria: Iago Gómez (p), Antonio Mato (p), Andrés Vila (2), Carlos Vilanova (4), Gabriel Castiñeiras (5), Julián López, Brais Puñal, Fran Rey, Juan Carlos Rodríguez (4), Manuel Méndez (1), Jorge Bouzas (2), Alejandro Calvete (1), Chimpo (3), Miguel Suárez – Pumariega.

Non fixo o seu mellor partido o Calvo ante o penúltimo da táboa, pero aínda así sacou o o partido adiante. No primeiro tempo parecía que ía vencer con comoidade, pero na segunda, o Xiria complicouse a vida, chegando ao último suspiro por debaixo no marcador. Pero non pesaron os nervios e en 3 serios últimos minutos o Xiria roubou 3 balóns para sumar outra vitoria.

1ª División Estatal Masculina, x.27

Resultado: Bm. Camariñas - Bm. Porriño (32-23)

Vitoria cómoda dos camariñas, despois de 7 partidos sen facelo, ante o pechacancelas. Custoulles romper o partido aos de Moncho Canosa xa que saíran demasiado tensos. Foron igualados ata o minuto 20 no que un arreón permitiulles marchar ao descanso 17-11. Ata entón, ventaxas de 2-3 goles que sempre conseguía neutralizar o rival. Na segunda metade saíron os conserveiros, arroupados pola afección, igual de enchufados marchando de 10 goles e a economizar esforzos ata o final. Gran partido de todos en xeral, sobresaíndo Fran e Antelo, e na portería Cristian.

2ª Autonómica, xornada 21

Resultado: Bm. Ferrolterra - Bm. Xallas (21-22)
Bm. Xallas: Martin (p), Fran (p), Raul, Rial, David, Samuel, Mario, Marcos, Viqueira, Juan, Gonzalo e Alex.

Esperaban os de Barbeira recuperar a confianza perdida nos últimos encontros ante o pechacancelas. E a pesar de que os locais puxeron as cousas ben difíciles a os de Santa Comba, conseguiron vencer. Comezaban mandando os locais, que provocaban perdas no ataque xalleiro cunha defensa moi adiantada. Tardou en chegar a reacción do Xallas ante o xogo que impoñían os ferroláns, ata que comezaron as conexións co pivote e os desdobramentos dos extremos, os xalleiros non facían dano a un Ferrolterra disposto a loitar pola vitoria. Primeira metade moi igualada, marcada en gran medida polas exclusións locais, que ante a intensidade das protestas, o arbitro víase obligado a sancionar en varias ocasións, chegando a xogar con ata 4 xogadores na pista. Aínda así o Xallas non conseguía escaparse no marcador, chegando ao descanso con unha renta de tan só un gol. Na segunda mellorou a defensa facendo que o xogo ferrolan se concentrase no lado dereito, pero no ataque as perdas de balón anulaban estas recuperacións. O Xallas non estaba cómodo en Ferrol e o ataque non chegaba a conectar os pases clave para finalizar, as perdidas de balón e os lanzamentos precipitados daban boa mostra dos problemas no ataque xalleiro. Chegaríase ao último minuto con máxima igualdade no marcador, adiantabase o Xallas e poñendo máxima concentración na defensa, forzou ao Ferrolterra a alargar o ataque e forzando un lanzamento incómodo lonxe da portería, que permitía aos xalleiros esgotar o tempo ata o final. 21-22, vitoria sufrida ante un rival que puxo en serios apuros a un Xallas que non teminou de encontrarse o seu xogo na pista ferrolá. O próximo partido será ante Moaña, o sábado as 20:00 en Fontenla.