Deporte e Saúde con DáFIT: Os mitos da Alimentación

Deporte e Saúde con DáFIT: Os mitos da Alimentación

06:35 23/12/15

Non cabe dúbida de que hai mitos en todas as partes e, de todos os sentidos, pero no campo do fitness, da alimentación e arredor do exercicio físico existen unha morea deles, que sen saber o porqué se foron perpetuando ó longo de tempo, sendo este un terreo moi propicio para a súa propagación. Hoxe falaremos dalgúns deles, tentado explicar ou dando aclaracións que poden resultar obviedades ou non, considéranse nalgúns casos verdades absolutas, e cometendo erros que poden ter consecuencias un tanto perniciosos ou, simplemente, que non se obteñan resultados esperados. Coidamos que para o 2016, este mitos estean máis que erradicados! Así que…

Comezamos!

Suar moito implica perder máis peso. FALSO!

O único que se perde é auga e electrolitos, recuperándoa ó repoñer líquidos, e sendo estes imprescindibles para a saúde o rendemento. A suor é só unha ferramenta que utilizamos para regular a nosa temperatura corporal. Así que, cando realicedes exercicio non esquezades hidratarvos. Canto mais se eleve a temperatura máis se súa, pero isto non está relacionado coa queima de graxa nin co gasto calórico. O verdadeiro indicador é intensidade ou o volume de adestramento, para medir esta intensidade, coa que se está a executar un exercicio, emprégase o ritmo cardíaco.

Si realizas exercicio físico pódese comer todo o que se queira. FALSO!

A alimentación é un factor clave, non tendo carta libre por realizar exercicio, os alimentos deberán ser suficientemente nutritivos, sans e en cantidades axeitadas. Si se consumen máis calorías das que se queiman facendo exercicio ou ó longo do día, o corpo seguirá acumulándoas, e gañarase peso en vez de perdelo. Polo tanto, só a combinación de alimento e exercicio físico garantirá o éxito.

Adestrar con pesas aumenta o volume muscular. FALSO!

Levantar pesas e o adestramento da resistencia con pesas, en xeral, axuda a tonificar, a dar forma ós músculos e a desenvolver a forza. Para conseguir unha musculatura prominente precísanse moitas horas de exercicio e probablemente algún tipo de suplementación. Si ben é certo, que hai adestramentos específicos para lograr este obxectivo onde se sobrecargan os músculos. Entre algunhas mulleres, existe a negativa de levantar pesas por medo a gañar corpulencia e acabar cunha musculatura demasiado marcada, pero isto non debe ser así. Xa que se precisa unha elevada carga de traballo específico.

Para queimar graxa débese realizar cardio co estómago baleiro, en xaxún. FALSO!

Isto pode que veña da idea de que si o corpo non ten alimentos dos que extraer as calorías, recorre ás reservas e queimará a porcentaxe de graxa. Pero estudos recentes demostran o contrario, que a combustión de graxas non varía, inxerindo ou non alimento antes dunha sesión de actividade física. Outro estudo demostra que saltarse un tentempé previo terá efectos negativos como catabolismo muscular (perda de músculo). O adestramento en xaxún pode ser recomendable si se buscan cambios metabólicos importantes e se ten un nivel de adestramento elevado, pero tampouco representa grandes vantaxes, nin resulta axeitado para principiantes ou para aqueles que realizarán un adestramento de longa duración. Está claro que o corpo precisa de enerxía para render, e esa enerxía obtense dos alimentos.

Canto máis adestras máis adelgazas. Nin FALSO nin VERDADEIRO.

Os músculos acostúmanse ós movementos, e os tipos de estímulo que lle ofrecemos. É fundamental variar os exercicios para non estancarse e para manterse, evidentemente, coidando sempre a alimentación e adquirindo hábitos de vida saudables. E tamén, hai que ter en conta, que cando un comeza a adestrar pode incluso subir de peso, xa que o corpo se fortalece e aumenta a masa muscular.

A mellor hora para adestrar é pola mañá. FALSO.

Practicamente, calquera momento do día é bo, só hai que ter en conta algúns factores:
- Si o fas pola mañá, procura non realizalo en xaxún.
- Si o fas pola tarde, procura que sexa despois da dixestión
- Si o fas pola noite, deixa unha marxe de tempo para o descanso e antes de deitarse, para poder conciliar despois o sono e non estar axitados.
Así que con este aspecto, non se deben utilizar escusas.

Só con abdominais poderás eliminar os “michelíns”. FALSO

O esencial para reducir o perímetro abdominal e ter un ventre plano é reducir os depósitos de graxa en todo o corpo, non só focalizar o traballo nunha zona, senón realizar un adestramento integral.

Si non doe o músculo, non estás adestrando correctamente. FALSO!

A dor nunca é boa. Débese notar que o músculo está traballando, e que se fatiga, pero nunca ter dor.

Ter maniotas ó día seguinte é síntoma dun bo traballo. Nin FALSO nin VERDADEIRO.

Ter maniotas é síntoma de traballar zonas que habitualmente non se traballan, (as maniotas son normais en fases iniciais) pero iso non implica que este realizado correctamente. E non ter é síntoma de que o exercicio foi perfectamente asimilado.

Unha cifra máis elevada na báscula indica que estás engordando. FALSO!

Parece unha obviedade pero non é de todo certo. Depende onde se este aumentando esa cifra, si de graxa ou de músculo, pois non teñen a mesma densidade. Un quilogramo de músculo ocupa menos espazo que un graxa, polo que se pode estar estilizado sen necesidade de perder peso, é dicir gañando músculo, pero non peso.

Si tes dor de costas, tes que practicar natación. FALSO!

Aínda que moitos médicos receiten ir a piscina, débese ter coidado. Cando se teñen molestias nas costas pode deberse a un gran número de motivos diferentes, e o que é bo para unha persoa pode ser pernicioso para outra. É necesario acudir a un medico e ter opinión experta per sobre todo personalizada. Sendo positivo que se complemente a natación con outro tipo de actividade que favoreza a tonificación.

Si non podes dedicar unha hora a facer cardio, non vale a pena. FALSO!

Todos os movementos corporais teñen efecto directo na combustión de calorías. O que se pode cambiar é a eficiencia desa combustión. A American Heart Association di que facer tres sesións de cardio de 20 minutos a un ritmo intenso (correndo, por exemplo) equivale a facer 5 sesións de 30 minutos a un ritmo moderado (camiñar rápido, por exemplo). Incluso 10 minutos a un ritmo intenso son beneficiosos. Así que o tempo tampouco debería ser unha escusa.

A clave para definir o músculo é facer moitas repeticións. FALSO!

Definir equivale a baixar a porcentaxe de graxa, e para iso o importante non é o número de repeticións, senón un adestramento que implique un gasto calórico considerable acompañado de traballo de forza e, sobre todo, dunha correcta alimentación.

A dieta__ “X”__ é a mellor. FALSO!

A dieta Paleo, a Sen glute, a Dukan, a Mediterránea, etcétera. Ningunha dieta ten o monopolio de hábitos alimenticios saudables. As boas costumes de nutrición e hábitos saudables deben manterse ó longo da vida, sendo realmente as únicas que axudarán a lograr obxectivos duradeiros.

Onte, co sorteo da Lotería, podemos dicir que quedou inaugurado “oficialmente” o Nadal, así que damos pistoletazo de saída ás festas! Disfrutade, que sexades felices e recordade que o determinante non é o comades ou fagades do 24 de decembro ó 6 de xaneiro, senón do 6 de xaneiro ó 24 de decembro, do ano próximo!

Este Nadal pensa no benestar e regala saúde, coida das persoas que máis queres, e obsequia DaFit! ;)