Fin de semana heroico para Damián, Paula e os equipos do ConcoBox
19:21 14/05/18
Paula Esteiro, segunda pola dereita, e Damián Espasandín, segundo pola esquerda, sumaron sendos podios no Mundial de equipos
Despois de acadar un fantástico 7º posto coa Selección Española no Mundial de OCR en Cerceña, esta pasada fin de semana Pontevedra acollía o Campeonato del Mundo OCR por Equipos e mais unha proba Heroican Race. E como non, alí estaban os nosos Paula Esteiro e Damián Espasandín, cun completo grupo do ConcoBox dumbriés, para deixar o pavillón tremendamente alto.
A proba celebrábase na Base Militar “General Morillo” de Pontevedra, e foi unha fin de semana de verdadeiro desgaste para os deportistas costeiros. Os equipos dos Vengadores de Damián espasandín e as Vengadoras de Paula Esteiro subiron ao podio ocupando as primeiras prazas. Ademais había 3 equipos da ConcoBox, dos grupos que DaFIT prepara para competir a gran nivel, conseguindo sumar varios podios en nome da Costa da Morte.
O sábado tocaba Mundial por Equipos. 11kms e 42 obstáculos nunha carreira con equipos de 4 compoñentes. Damián e os seus Vengadores conseguían o 2º posto, mentres que as Vengadoras de Paua vencían con solvencia.
Ademais, tamén competían 3 equipos (2 de homes e 1 de mulleres) que adestran no ConcoBox de Dumbría. As mozas subiron nada menos que a o 3º chanzo do podio.
Aí é nada, 3 podios dun Mundial para a Costa da Morte. “Incrible resultado!” afirma contentísimo Damián.
Equipo de mozas do ConcoBox que subiu ao podio do Mundial
Cita ligueira
Sen tempo a descansar, o domingo Damián e Paula tiñan carreira da Liga na que compiten: A Heroican Race. Era o mesmo percorrido, e na carreira de 11km, Paula estreaba o título de “Camariñana do ano” cun 4º posto, mentres que Damián acadaba o 9º. Non quedaron contentos, así que o domingo pola tarde, os dous deportistas aínda fixeron a Heroican de 5km, quedando Paula na 1ª posición e Damián 3º, dous novos podios para completar a finde. Na xeral mantéñénse no 2º e 3º posto respectivamente. Hai que quitar o sombreiro antes deportistas, capaces de facer 3 carreiras, arredor de 30 km superando 100 obstáculos en apenas 24 horas… “Descansade, anda, descansade”, que lle dirían as nais…Novas relacionadas
- Maio 18: Paula Esteiro estrea o título de “Camariñana do ano”.
- Abril 18: Paula Esteiro e Damián Espasandín conseguen o 7º posto coa Selección Española nos Mundiais da OCR.
- Outubro 17: Paula Esteiro e Damián Espasandín traen un podio e un top20 do Mundial de Carreiras de Obstáculos:
- Dous soneiráns no Campionato do Mundo de Carreiras de Obstáculos.
- A Costa da Morte, potencia continental en Carreiras de Obstáculos.
- Damián e Paula manteñen postos e podio na liga nacional da Gladiator Race.
- Decembro 16: Dous soneiráns no Campionato Nacional de Carreiras de Obstáculos.
Artigos relacionados
Fonte
- Redacción de QPC ([email protected]).