Nova fin de semana completa do fútbol da Costa esta do 21 e 22 de xaneiro de 2012. E tras repasar a primeira volta da Liga de FS de Cee, imos cos resultados desta xornada.
Na Preferente, só o Soneira quedou contento cunha clara vitoria ante o Mugardos nun encontro de vital importacia que o saca ata a 15ª praza empatados precisamente cos ferroláns. Polo demais, cómpre destacar o empate do Dumbría ante o Dubra nun partido bronco. Porque parece que os equipos xalleiros son outros neste comezo de ano e tanto verdes como laranxas están sufrindo máis da conta. O Santa Comba non suma desde comezo de ano e xa cae dos 4 postos privilexiados tras perder nun choque clave ante o Narón (2º) que se decidiu no min.89 nunha xogada chea de rexeites á saída dun córner. Tampouco o Xallas sumaba na casa e perdía 0-1 co Val nun partido que merceu moito máis.
Na 1ª, o Ponteceso sumaba os puntos que se lle seguen escapando ao Cee. Os de Marco xa están xa no 11º posto con 24 puntos, lonxe de Villestro e Cee, con 13 e 11 puntos respectivamente. Porque moito teñen que cambiar as tornas no clube ceense para remontar, malia que os de Llanero sigan dándoo o todo domingo a domingo.
A xornada na Liga da Costa deixa a un Fisterra que parece que se descolga. Caía en Nantón e xa son 8 os puntos que Club do Mar e Camariñas (estes non fallan) lle sacan aos de Jesús. Por detrás segue o Corme, que sufría ata o minto 90 para sacar os 3 puntos do campo do pechacancelas. O Baio daba conta do seu estado de forma e batía cun 4-0 á SD Sofán, o Malpica vencía en Castriz e o Muros facía o propio ante o Zas para seguir nese grupo de arriba. Por abaixo, a derrota do San Lorenzo en Verdillo ante o Dumbría B deixa aos de Chema EIrís ocupando esa 2ª praza de descenso trala importantísima vitoria do Nantón. Os cabaneses quedan agora empatados co Zas a 17 puntos, 1 máis que o San Lorenzo. Non se pode despistar o Mazaricos (18 puntos), que vancía tamén un encontro clave ante a Esteirana, e o Castriz (19), que leva unha malísima racha e non está seguro. O Corcubión, que onte apretaba as torcas aos caioneses, mantéñense na 12ª praza con 21 puntos, na fronteira.
Segue espectacular a 3ª unha semana máis. O Cabana non fallou e segue líder afianzado. Por detrás tampouco fallaron os Carnota, Outes e Coristanco ante equipos de abaixo. Pero o que si sufriu e quedou cun só punto foi o Montelouro ante o veciño Lira que o deu todo no Agra da Figueira. E ten que mirar cara abaixo o cadro loureán pois chegan o Volantes e o Cerqueda moi fortes, sen esquecer ao Porteño que non pasaba do empate ante o Fisterra B. Un filial fisterrán e un Laxe que quedan xa un pouco lonxe destes 6 postos de arriba.
As Ligas Xuvenís vanse decidindo a falta dunha xornada para o remate da liga regular. Polo norte, o Ponteceso queda fóra dos 4 postos que irán á Liguiña entre os 8 mellores da categoría, da que sairán 2 equipos para a Fase de Ascenso á Liga Galega. Os de Mato non podían co potente Dumbría B. Un Dumbría B que se pon a tiro do Malpica, pois estes non sentenciaron a Liga ante un mellorado Coristanco e todo quedará para última xornada na Pedra Queimada. Camariñas e Baio aseguraron o pase esta semana. Por abaixo, o Santa Comba vencía 2-0 ao Outes, e os da Serra quedan practicamente fóra unha vez que o Soneira aseguraba o seu pase vencendo en Esteiro.
