Aló polo 13 de setembro de 2020, dous individuos (un natural de Carballo) entraban nunha casa unifamiliar de Fisterra, conseguían roubar 2.022 euros en metálico, varios reloxes, unha cadea e un móbil, e antes de marchar provocaban un incendio nun vehículo situado no garaxe para intentar borrar as probas do delito.

Poucos días despois eran detidos pola Garda Civil e postos a disposición da Xustiza.

Tralo xuízo celebrado estes días (os acusados negaron todos os feitos argumentando que estaban alí “mirando as mareas”), a sección primeira da Audiencia Provincial da Coruña vén de condenar a 15 anos e 3 meses de cárcere; e a 13 anos e medio de prisión, respectivamente, a cada un dos dous homes. O tribunal considerounos autores dun delito de incendio con perigo para a vida ou integridade física das persoas de menor entidade; dun delito de roubo con forza nas cousas; e dun delito de roubo con forza en casa habitada.

Os maxistrados consideran probado na sentenza que, tras fracturar a porta dun vehículo e apropiarse dun feixe de chaves, entre as que estaban as da vivenda, accederon ao interior da casa, e provocaron un incendio no seu interior. O lume, segundo consta na sentenza, xerou “un perigo para a vida e integridade física das persoas”.