Xa vimos que os grupos que xestionan os fondos europeos na bisbarra veñen de cambiar de política. Antes favorecían o crecemento e a aparición das pequenas empresas. Pero dende este ano os proxectos van máis encamiñados a crear proxectos turísticos para os Concellos. Semellantes ao que coñecemos hoxe estanse a desenvolver noutros Concellos como Muxía, Malpica ou Vimianzo. Pero desta volta rematamos en Fisterra para coñecer a nova aposta do GAC.

"Fisterra dende a nube", que aparece no BOP da Deputación con un proxecto que se contratará a través dun procedemento negociado sen publicidade, conta cun orzamento duns 35.000€. "Fisterra dende a nube" pretende servir de revulsivo turístico sempre ca intención de crear alternativas económicas á actividade pesqueira.

Desta volta os protagonistas son os códigos QR, que xa sufriron algún fracaso que outro na bisbarra da man da Asociación Neria. A idea consiste en crear unha ruta auto guiada dende o centro da vila ata o Faro, que contará cunha serie de puntos de información aos que se accederá mediante os códigos QR, sendo o teléfono móbil a ferramenta necesaria para realizalo.

A maiores dos soportes nos que se sitúan os indicadores QR, preténdese utilizar a tecnoloxía NFC de radiofrecuencias. E tamén se procederá a instalación de 3 paneis de presentación da información a nivel xeral e situados ao comezo de cada unha das zonas máis importantes (Igrexa de Santa María da Areas e conxunto do Faro).

Veremos pois se este proxecto funciona para os milleiros de turistas que nos visitan, e valoremos tamén se a política dos entes que xestionan os fondos europeos de investir en proxectos turísticos municipais é o que máis necesita a bisbarra.

Novas relacionadas

• 2,5 millóns de euros a través do Plan Leader entraron na Costa dende o 2007.
• Os hostaleiros de Vimianzo coñeceron a oferta de turismo gastronómico de Arousa.
• Unha viaxe en vídeo camiñando cara ó mar de Muxía.
• Malpica, o porto dos soños, o mar de Sisargas.
• Fisterra prantexa un outono de teatro.
• Agardando polos códigos Qr.

Fonte

• Redacción de QPC (info@quepasanacosta.gal).