Este domingo 24 de setembro arrinca a temporada para 16 equipos do Fútbol Feminino da Costa da Morte. Un FUTFEM costeiro que hai 2 anos apenas tiña 4 equipos en competición pero cuio crecemento é exponencial.

Queremos coñecer como comezan a competición tanto os 3 equipos da 2ª División Feminina como os 12 da 3º Div. Fem., así como o Sporting Seaia que competirá este ano de estrea no F7 (empezan o 1 de outubro), e para iso, falamos cos seus adestradores e lles facemos as seguintes preguntas:

• 1.- Como valoras a revolución do FUTFEM na comarca?
• 2.- Como chega o teu equipo a este inicio de competición? Que fortalezas tendes?
• 1.- Con que aspiracións partides?

2ª Div. Feminina	Xallas F.C.	Rupper
	U.C. Cee	Rafa Suárez
	As Miúdas	Lucho
3ª Div. Feminina	C.F. Dumbría	Fran Figueroa
	Mazaricos C.F.	Rachón (novo)
	Ponteceso S.D.	Curro
	Corme C.F.	Rubén Souto
	U.D. Cerqueda	Dani Reixía
	U.D Corcubión	Rubén Castillo
	Outes C.F.	Dani
	Fisterra S.D.	Fran
	E.F.C. Camariñas	Juan Cabrejo e Pepucho
	Cabana S.D.	Jose Manuel
	Muxía C.F.	Congui e Isma Pose
	Bergantiños B	Nacho
F7	Sporting Seaia	Alejando Chouciño “Roque”

2ª Div. Feminina

Xallas (Rupper)

1.- O interés do público polo fútbol feminino é claro e vai en aumento e esta revolución futbolística tiña que darse antes ou despois na Costa.
As habilidades das xogadoras e a paixón que lles poñen, algo que parece descender no masculino, engancha.
Segue habendo xente que entende o fútbol como un lugar de e para homes, ou cun trato desigual como deixarlle os peores campos, vestiarios, horarios ou vestimentas para as rapazas... Pero a maior dificultade era que non había equipo ou clubes que apostaran por elas e eso grazas a ELAS mesmas cambiou nestes últimos anos.

2.- O Xallas chega a este comezo un pouco xusto tanto de carga física como competicional xa que xogamos poucos amigables e por motivos laborais e vacacionais non estamos o noso 100% e nesta nova categoria vainos levar un tempo acomodarnos.
A nosa fortaleza espero que volva a ser a unión e a paixón que lle poñen en cada balón que estea en xogo, e que nos sonría a deusa fortuna de vez en cando que todo fai falla.

3.- A única aspiración que temos nesta nova 2ª Galicia, é a de competir en cada partido, tratando de salvar a categoría, cuns desprazamentos moito mais longos e con equipos que nos poden sorprender táctica e técnicamente por descoñecemento dos mesmos.

As Miúdas (Lucho)

1.- É unha moi boa nova, o esforzo de moita xente vai dando froitos e afortunadamente máis nenas, mozas e mulleres atrévense a iniciarse nun deporte que tan lonxe parecía que estaba. Con todo, queda moito que facer aínda, é un bo comenzo pero debes traballar en seguir avanzando que aínda estamos lonxe de, por exemplo, os senior masculinos. Ser ir mais lonxe, nos horarios dos partidos.

2.- O equipo chega con moitas gañas de competir nesta nova 2ª División. Un equipo moi moi novo, no que a nosa maior fortaleza é a ilusión e o moito que lle gusta este deporte.

3.- A nosa aspiración é intentar aprender o máximo nunha categoría con moito nivel, intentar aprender a ser competitivas e mellorar o máis rápido posible. Despois xa co avance da competición iremos vendo o nivel que temos e que obxectivo marcar.

Cee (Rafa)

1. Paréceme moi positiva a revolución máis que evolución do fútbol feminino na Costa da Morte. Esperemos que se consoliden todos os novos proxectos e se manteñan no tempo pois sería moi positivo para elevar o nivel e aumentar a competitividade do fútbol costeiro que suporía unha maior posibilidade de proxección para as xogadoras.

2.- Este ano imos xogar por fin unha liga cun alto nivel de competitividade e un nivel máis parello entre todos os equipos aínda que para nós vai ser unha tempada dura pois quizáis teñamos a plantilla máis limitada desde a nosa creación polas importantes baixas que tivemos por diferentes motivos. Ademais, unha parte importante do equipo inicia a súa andadura universitaria coa limitación que iso supón á hora de adestrar.

3. A aspiración sempre foi a mesma, conseguir a maior evolución posible das nosas xogadoras e como obxectivo deportivo do clube, este ano vai tocar loitar por non pasar apuros.

 

3ª Div. Feminina

Dumbría (Fran Figueroa)

1.- Pois por parte das directivas e os clubs que deron o paso valoro moi positivo, para seguir co camiño andado e que cada día máis xogadoras vexan que é posible disfrutar do noso fútbol sen mirar para fóra. A Costa ten calidade de sobra, falta que o creamos para coidala e que non nos vexan como canteira de outras zonas, o talento ten que competir e medrar aquí.
Por parte da Federación boto en falta que lles interese algo máis que o aumento das licencias e miren por facer unha competición acorde o traballo dos clubes, non o despropósito da pasada temporada.

2.- Chegamos con algunha baixa tanto por lesión como por motivos laborales, pero eso é algo que se pode dar en tódolos clubes. A nivel anímico con moitas ganas de arrancar, somos competitivas e así o demostramos na pasada temporada.
A nosa maior fortaleza é o grupo, pode soar a tópico, pero son consciente de que estou rodeado de xogadoras moi talentosas e salvo a de Ainoa, que non podía continuar, non perdemos a ninguén, mantemos o conxunto do ano anterior e aínda sumamos a Adriana, Laura e Alba, que, xunto co novo equipo cadete, nos pon nunha moi boa situación para mirar cara arriba.

3.- Se nos respetan as lesións e facemos o que hai que facer entre semana non teño dúbida de que estaremos arriba, agora ben, isto é fútbol, e cada partido é diferente, as rivais tamén melloraron e se reforzaron, outras arrancan con moi boa base e con xente ó mando que sabe faser as cousas, solo pido sorte en canto a lesións para que elas mismas demostren cal é o sitio que merecemos. E esa misma sorte é a que lles desexo ás rivales para que todas poidan disfrutar cada semana do que tanto nos gusta.

Cerqueda (Dani Reixía)

1.- Esta revolución xa comezaba a verse nos equipos de base de F8. Era cuestión de tempo que saira adiante. Aínda así, é un paso brutal nesta comarca. Só hai que ver os mapas das competicións para darse conta.

2.- O noso equipo chega coma moitos en construción, e con moitas ganas de que arranque.

3.- As únicas aspiracións son que as rapazas disfruten de todo esto, crezan tanto personal coma deportivamente. E competir o mellor posible sabendo quen somos e onde estamos.

Corme (Rubén Souto)

1.- A valoración para min é brutal, penso que nin os máis optimistas pensaban que isto ía a estoupar así de ben, e xa non só coa creación dos equipos, se non como crecen e melloran. Sempre que puiden fun ver distintos partidos e equipos nesta pretemporada e en 15 días o mismo equipo pegaba unha melloria incríble, e iso é o que máis contento me pon.
Hai moitísimo futuro no fútbol feminino da Costa, sen dúbida, hai que apostar por el por parte dos clubes e mantelo e melloralo por parte das xogadoras.

2.- O noso equipo non chega nas mellores condicións, ou polo menos nas que tiñamos planificado estar agora mismo. A parte das baixas de xogadoras que este ano por unhas cousas ou outras non puderon seguir, a fichaxe de Naroa polo Victoria A de 3° Federación, cousa que nos pon moi contentos e nos alegramos moito por ela, hai que sumarlle varias xogadoras con traballos de turnos de tarde que as impiden entrenar e incluso vir xogar alguns findes, lesións de pretemporada, vacacións, etc ... pois o dito, non chegamos o inicio como queríamos pero é o q hai e vamolo coller con moitas ganas igualmente.

3.- A aspiración para este ano é mellorar a todas as xogadoras a nivel individual e tamén como equipo cada día.

Ponteceso (Curro)

1.- Pois e algo que xa se estaba vendo vir nos últimos anos. Eu viña de entrenar 10 anos en futsal e xa por entonces había moitas rapazas novas que non tiñan onde poder xogar por idades ou falta e equipos , e agora con todos os éxitos que a nivel local e nacional que se están acadando pois e a mellor maneira de poder seguir fomentándoo e loitando porque siga así e que tod@s teñamos as mesmas opcións, pero dende logo algo que a min me enche de orgullo e ver as nosas rapazas da base poder estar adestrando o lado das sénior e das que algún día se cambiarán as tornas ou poderán xogar a par e que non hai moito era impensable.

2.- Pois creo que fixemos unha moi boa pretempada con 9 amigables disputados, e tamén temos un ano máis de experiencia no que seguro que nos axudará e nos fará seguir medrando partido a partido. Comezaremos tamén con algunha baixa importante para o inicio ligueiro, pero teño plena confianza no plantel.
A nosa gran fortaleza e ser un equipo unido e que nunca se rende , sempre seremos un óso duro de vencer.

3.- Pois esa é unha boa pregunta e o mesmo tempo moi difícil de responder xa que partimos nun grupo costeiro no que a maioría de conxuntos son de nova creación e non nos coñecemos as caras, pero as nosas intencións sempre serán intentar estar no grupo cabeceiro da liga e facer seguir medrando a este gran equipo.

Mazaricos (Rachón)

1.- Valóroo dunha forma moi positiva xa que esto dou pé a poder crear a primeira Liga da Costa feminina, unha oportunidade moi boa para elas xa que coñeceran o Fútbol da Costa de primeira man. Outro aspecto positivo da creación de tantos equipos costeiros, é a reducion dos desprazamentos para elas xa que os primeiros anos de fútbol 7 tiñan que desplazarse ata Lugo para poder xogar e agora a maioria dos partidos son preto da casa.

2.- O equipo chega con moita ilusión xa que a liga vai a ser moi competitiva. Ao final o ano pasado estaban nunha liga na que a diferencia entre as de arriba e as de abaixo era moi notable. Este ano a maioría dos equipos teñen planteis semellantes e iso axudara a que poidas competirlle o partido a casi calquera equipo.
O equipo defínese por un xogo combinativo xa que temos rapazas con moi bo pé. Aparte temos unha mezcla de veteranía (con xogadoras como Tamara, Graciela ou Ánxela con moita experiencia) e xuventude (a maioria do plantel ten menos de 20 anos).

3.- Temos como único obxectivo seguir mellorando e seguir traballando sobre as bases que deixou Borja Sueiro. Ao final intentamos que as rapazas se sigan contaxiando e que cada vez haxa máis equipos e máis xogadoras na comarca.

Corcubión (Rubén Castillo)

1.- Pois positivamente. Penso que foi un acerto esta nova categoría e que estamos só no comezo, queda moito que recorrer como que haxa adestradoras ou crear esas rivalidades sanas entre equipos da mesma zona pero a ilusión por empezar é grande e é un bo comezo.

2.- Chega con moitas ganas de facer un bo papel e poder demostrar o potencial que ten. Como principal fortaleza diría que son un equipo moi unido, que se conocen á perfección e con confianza.

3.- Pois ganar o primeiro partido e ir mellorando un a un.

Outes (Dani)

1.- É unha maravilla que as rapazas e as mulleres da comarca se animen a participar, e por descontado os clubes. Cantas máis sexamos moito mellor. A revolución do fútbol femenino está comezando e vai ir a máis seguro.

2.- Nós estamos comezando nesta aventura, así que o ínico que podo dicir é que chegamos con moitas ganas de facelo ben e aprender.
Fortalezas? Eu creo que a mellor que temos e o enorme grupo que forman as xogadoras, onde se apoian unhas a outras. E por suposto a masa social que nos acompaña sempre en Outes.

3.- Non nos marcamos ningunha aspiracion máis aló de aprender e mellorar.

Fisterra (Fran)

1.- Penso que era importante que medrara e esperemos que veña para quedar moitos anos xa que a xente non para de preguntar para xogar, os campos de futbol teñen moita afección. Pola parte que a min me toca todo mundo me pregunta cando xogamos.

2.- O meu equipo chega a este inicio de temporada con moita ilusión e gañas por ser a primeira vez que vamos poder competir. A fortaleza que temos, sen dubidalo, penso que é a unión e bo compañeiras que son tendo en conta que no meu equipo as idades oscilan entre os 14 anos e os 53, de feito, teño nai e filla xogando xuntas.

3.- As nosas aspiracións, sendo un equipo novo, son as de aprender e competir o máximo todos os partidos e co paso dos partidos que a xente nos siga apoiando como esta pretemporada. Desde a nosa parte intentaremos responder con moito traballo para que a xente se anime e poder crear una base para o futuro.

Cabana (José Manuel)

1.- Positivamente xa que ata agora había moi poucas opcións de practicar o deporte que lles gusta e tiñan que desprazarse, e co aumento de equipos pois todo é máis doado e a afección das nenas polo fútbol irá en aumento.

2.- Como todos os equipos que se fan por primeiro ano, chegamos con moita ilusión pero conscientes de que acabamos de empezar e queda moito que aprender e mellorar pero coa actitude inmellorable que están tendo as xogadoras creo que imos progresar segundo avance a competición.

3.- As nosas aspiracións resúmense en dúas palabras: "divertirse e competir'. Sabemos que de momento non podemos compararnos con equipos con máis experiencia e recorrido que nos pero trataremos de ser competitivas como parte do aprendizaxe e sen pensar en clasificacións.

Bergantiños B (Dani)

1.- Valóroa positivamente xa que o considero o inicio de algo que, dentro duns anos, vaille dar moito a este deporte e cada xeración vai ser mellor. Moitas nenas xa se interesan polo fútbol con unha curta idade e, gracias a que moitos clubs están creando equipos femeninos, esas nenas é fácil que atopen un cerca da casa e non se teñan que desplazar para poder practicar o deporte que lles gusta.

2.- O equipo chega sabendo o que ten, sabendo que vai ser un ano lungo xa que todo o noso equipo é cadete excepto 3 xuvenís, non temos ningunha xogadora Senior. É un equipo curto, que nunca xogou fútbol 11 90 min contra mulleres de maior idade e teñen claro que temos que competir cas que somos. Traballan ben, fan o que se lles di, e é un bo grupo. Eu personalmente estou encantado con elas e intento dicirllo sempre que podo. Podo falar con elas e elas comigo sen problema. Esa é a nosa fortaleza, o grupo, coñécense, lévanse ben e queren xogar xuntas, se unha non pode dar o 100% hai outra para cubrir ese puntual baixo rendemento e, sendo as que somos, non podo facer mais que agradecerlles a sua implicación.

3.- Aspiracións? Ningunha, tratar de competir contra equipos superiores en idade e físico. Xa o vimos en pretemporada, partidos que dominamos e por 2 detalles escápanse, partidos que podemos gañar e un rebote nos últimos minutos fastídianos. Hai cousas e elas sábeno, só temos que saber potencialas dentro do esperado hándicap de ser inexpertas.

Muxía (Isma Pose)

1.- Penso que é un paso adiante a creación de tantos equipos costeiros este ano. O futbol feminino é algo que que está crecendo e o feito de que as rapazas teñan a posibilidade de xogar no equipo dos seus pobos fai que o Fútbol da Costa se enriqueza aínda máis. O seguinte paso sería crear máis equipos de fútbol base para que as rapazas podan empezar a xogar desde pequenas e non ter que buscar equipos fora si queren xogar o fútbol.

2.- Levamos moitos meses entrenando e as rapazas chegan con muitas gañas e ilusión de empezar a liga xa que para moitas é a primeira vez que van a competir. Penso que a nosa maior fortaleza é o sacrificio que como di a nosa capitana Patri Romaní, xunto con Barca as dúas veteranas que volven a casa para arrincar o proxecto: “aquí non se negocia unha carreira”.

3.- Non temos ningún obxectivo en concreto para esta liga, intentaremos saír a competir o mellor posible cada partido e sobre todo que as nosas Corviñas disfruten e aprendan individual e colectivamente.

Camariñas (Juan Cabrejo)

1.- Creo que o fútbol feminino na Costa está en auxe, ao igual que no resto de Galicia. A clave para min é que as mulleres deron un paso adiante e deixaron atrás a vergonza e o "que dirán" por ser un xogo considerado masculino. Penso que a visibilidade cada vez é maior, partidos televisados, prensa, etc… fan que suba o interese e as gañas por xogar. A isto súmaslle o Campionato mundial e as licencias suben como a escuma.

2- Na nosa Escola, debido á gran demanda de interesadas, creamos o equipo feminino sobre todo pensando no futuro das nenas que están en categorías inferiores e que deste xeito non teñan que marchar para ningún outro clube porque teñen a posibilidade de xogar no seu equipo senior.

3.- Esta tempada para nós vai ser de aprendizaxe, somos novatas e teremos que aprender cousas en cada partido, pero tamén vai ser a tempada da ilusión. Somos un plantel moi amplio, no que vai costar facer cada convocatoria e na que disfrutaremos cada fin de semana. Non nos poñemos ningún obxetivo máis alá do de poder participar e disfrutar desta liga.

F-7

Sporting Seaia (Alejando Chouciño “Roque”)

1.- Impresiona bastante o crecemento que tivo de fai uns 5 anos para aquí, e dende fai 2 xa nada… Traballaremos para fomentar este deporte para que as xogadoras que tiñan que desplazarse para poder xogar xa non teñan necesidade de facelo, e para que as novas xogadoras lles guste e non o deixen o primeiro ano.

2.- O equipo chega con gañas de empezar a liga e empezar a medirse a diversos rivales, de máis e de menos nível, o importante para elas e coller partidos, xa que é o primeiro ano para practicamente todas.

3.- As aspiracións, como club, non son só manterse, senón que tamen seguir medrando. A directiva fai un gran esforzo para poder sacar a competir 2 equipos dun sitio como Seaia que non deixa de ser unha pequena aldea. Como equipo as aspiracións non son outras que aprender a competir, das que estou seguro que o conseguiremos.

 

Todas as novas do FUTFEM

• Clasificación da 2ª Div. Fem. en www.futboldacosta.com.
• Clasificación da 3ª Div. Fem. en www.futboldacosta.com.