As instalacións do Conco, epicentro deportivo da comarca, serán a sede dunha nova Escola de Porteiros a nivel comarcal. O CF Dumbría e o Concello unen forzas con Fútbol Emotion, a escola de José Sambade, para ofrecer esta posibilidade a toda a zona.

O herculino Sambade, un dos grandes pioneiros na materia de formación específica de porteiros, estará acompañado de Fran Martínez, recoñecido porteiro da zona que ten viaxado por medio mundo coas luvas como CV.

A escola estará en funcionamento de setembro a maio, dous días á semana (previsiblemente luns e mércores).

Ademais, como anticipo, entre os días 27 e 30 de xuño desenvolverase un clinic específico de porteiros.