Semana de leas no Concello de Laxe, por varios motivos. Primeiramente, polas festas parroquiais da Cruz da Rosa, e despois de que durante estas semanas se especulase sobre a contratación dunha empresa privada para organizar as festas.

Unidas Podemos vén de presentar un escrito no Concello pedindo solicitar o expediente de contrato dunhas supostas Festas da Cruz da Rosa. Pero resulta o cartel que se estaba espallando polas redes sociais, co logo municipal, para a celebración prevista para o vindeiro 21 de xullo, era falso. Así o recoñecía o Concello a pasada tarde rogando á veciñanza que non o siga compartindo.

”Non saímos do noso asombro ante un cartel sobre as festas da Cruz da Rosa”, denuncia Fernando Regaldie, de Podemos, que “insta ó equipo de goberno a denunciar ós responsables pertinentes e pola utilización vana que fan do logo do noso Concello como organizador”.

Tamén o BNG considera que neste suceso “o Goberno do PP roza o ridículo”

Desgoberno na programación

Pola súa parte, o BNG local denuncia “o desgoberno do concello tanto na organización das festas como na programación de verán”. A concelleira Cris Vázquez advirte que “o descontrol do equipo do PP prexudica á veciñanza e ao sector turístico clave na economía local”. Lembran que “a biblioteca está pechada, o ximnasio ten un horario moi limitado para as persoas usuarias e a organización das festas patromoniais é caótica”.

”O Goberno do PP presentou un cartel de actividades pobre e escaso, tanto é así que tenta tapar a súa falta de propostas incluíndo na cartelería oficial intentando facelas pasar por propias, actividade que realizan outras entidades ou empresas, como por exemplo os campionatos de salvamento e de surf ou o mercado pirata, para “encher” artificialmente unha programación rotineira”, lamentan.

O BNG vai presentar unha batería de preguntas no próximo pleno, “reclamando as explicacións oportunas á veciñanza e reclamando solucións inmediatas, entre outras, ampliación do horario de uso e desfrute do ximnasio, restablecendo de inmediato o servizo de biblioteca, unha programación de verán ambiciosa e actualizada e, por suposto, que aclare que está facendo para que Laxe poida celebrar as súas festa patronais.