Xa van 4 meses dende que Medio Rural lle comunicou á A.VV. Monte d’Arxa que a parcelaria de Cerqueda estaría rematada no 2011. Pero a Asociación de Veciños Monte d’Arxa de Cerqueda xa ten amosado a súa disconformidade e agarda dende hai un par de meses unha reunión co alcalde de Malpica, José Ramón Varela Rey, unha reunión para estudiala conxuntamente. Denuncia hoxe a entidade que "o Concello amosa deixadez nas obras súas parcelas cando as máquinas xa están a piques de rematar as obras". E mentres os veciños non reciben explicación algunha, malia que xa hai varias semanas que o alcalde de Malpica de Bergantiños se reuniu con técnicos de Medio Rural na Coruña para informarse de distintos aspectos reclamados pola Asociación de Veciños Monte d’Arxa de Cerqueda.

"Deixadez do Concello nas parcelas municipais"

Este foi o punto máis importante da reunión mensual que tratou a directiva de Monte d’Arxa. Ademais, na mesma comentouse que varias das reclamacións que esta asociación de veciños presentara por escrito por rexistro no concello están como hai tres meses: "non se moveu unha palla". Por exemplo, solicitáraselle ó alcalde que as máquinas retirasen o valado de pedra que divide a parcela municipal adxunta que linda co centro sociocultural das Pozacas. Pois ben, estes días a maquinaria retirou todos os valados das propiedades privadas das Pozacas e quedou sen sacar o da parcela municipal. Así, desde Monte d’Arxa denuncian publicamente "a deixadez que amosa o equipo de goberno municipal neste asunto xa que amosa un total desinterese". Aseguran que "esta deixadez terá consecuencias económicas graves no futuro, dado que, unha vez que marche a empresa, calquera actuación nesa parcela deberá pagarse con diñeiro municipal".

Novas relacionadas

• Monte d’Arxa non está conforme coa obras da parcelaria de Cerqueda.
• Medio Rural comunica á A.VV. Monte d’Arxa que a parcelaria de Cerqueda estará rematada no 2011.

Fonte

• Nota de prensa da A.VV. Monte d’Arxa.