36 anos de tradición e canteira

15:52 17/10/16

Nova Directiva da AC Raiganas de Cerqueda-Malpica

A Nova Directiva da AC Raigañas de Cerqueda non pasa dos 18 anos

36 anos de tradición non pasan de balde. Mesmo para aqueles que nin naceran cando se constituía alá polo 1980 a Asociación Cultural Raigañas de Cerqueda. Eses que collen o relevo dunha directiva que leva moitos anos tirando o carro, e coidando que o patrimonio e o saber tradicional desta parroquia malpicá non quede no esquecemento.

O pasado sábado celebrouse unha importante asemblea da asociación. A directiva, que xa levaba 14 anos á fronte, decidía dar un paso atrás. E había moitas dúbidas sobre a renovación. Pero o traballo de canteira, semellante ao que fan pola aldea gala do Couto ou a xente de Adro de Baio, ten os seus froitos, e o relevo está dado.

Un grupo de mozos veñen de dar ese paso á fronte que se facía necesario. Un grupo de rapaces novos da parroquia, toman o mando. Todos os membros da nova directiva teñen relación directa co #MundoRaigañas. Tod@s rondan os 18 anos. O presidente é Xacobe Nieto, o único home da directiva; a vicepresidenta será Ángela Varela; Andrea será a Secretaria; Rita a Tesoureira e María, Lucía e Ana as vocais.

“Tomamos o relevo porque estivemos toda a vida na Raigañas, algunhas directamente e outras por parte dos nosos pais, e ao enteirarnos de que a anterior directtiva estaba pensando en deixalo, o lóxico era que o colléramos nós en vez de vir xente de fóra”, explica Xacobe, fillo dun home que leva toda a vida bailando na Raigañas, do que tomou tamén o gusto e tamén baila dende hai 3 anos.

Chegan “con moitas ilusións e moitas ideas”, como nos conta Xacobe, e “non lle temos medio ao aparato burocrático, se cadra respecto, pero aí seguro que temos a axuda dos membros da ex directiva, polo menos durante o primeiro ano”.

A idea segue a ser a de poñer en valor os nosos saberes tradicionais. “En principio imos seguir a mesma liña que a anterior directiva, coidando as mesmas tradicións, como a Foliada, ou os Madamitos do Entroido. E co paso do tempo intentaremos introducir algo máis para que non se vaia perdendo o noso patrimonio”, explica seguro o presidente.

Longa vida á Raigañas.