O BNG presentou o pasado venres a súa candidatura para gobernar Malpica de Bergantiños a partir do 22 de maio. O acto de presentación tivo lugar no Restaurante Casa Elías (estivo seguido dunha cea de confraternidade entre militantes e simpatizantes do BNG) coa presencia dun cento de persoas que arrouparon o novo equipo do BNG para a localidade. 

"Unha candidatura completa e representativa"

Roberto García, candidato do BNG á alcaldía de Malpica de Bergantiños, centrou a súa intervención na presentación e explicación da súa candidatura. O candidato do BNG destacou que se trata dunha candidatura representativa do concello malpicán, onde todas as parroquias están representadas por varias persoas no conxunto da candidatura. 

Roberto García tamén salientou que entre os vinte e tres nomes que compoñen a lista do BNG (os 13 postos titulares e o máximo de 10 suplencias permitidas pola lei) se procurou combinar, ademais da territorialidade, o equilibrio de xénero e a combinación de mocidade (tres dos cinco primeiros postos están ocupados por mozos e mozas que aínda non chegan aos trinta anos) coa experiencia.

O BNG de Bergantiños apoiou a candidatura de Malpica

No acto de presentación estiveron tanto responsables orgánicos do BNG de Bergantiños (Milagres Lantes, Xosé Regueira ou Vítor Recarei) como os candidatos á alcaldía do resto de concellos da comarca, que respaldaron na súa totalidade a candidatura de Malpica de Bergantiños.

Carlos Aymerich aposta por devolver aos concellos o seu papel orixinario